لەموجامەلەی شەیتانەوە بۆ لێپرسینەوەی.. کێ دەستی کێی گرتوە؟

مەجید ساڵح
  2019-04-05     960

(1)
لە دوای هەڵبژاردنی (21)ی ئەیلولی (2013) کاک نەوشیروان، نەجمەدین کەریمی بانگ کرد و پێی وت بەوبرادەرانەتان بڵێ ئێمە (24) کورسیمان هەیە و ئێوە (18) کورسی، لای خۆمانەوە ئامادەین لە گەڵ یەکێتیدا هاوپەیمانییەک لە پەرلەمان دروست بکەین و هەردولامان ببینە گەورەترین فراکسیۆن و ئەو کاتە خۆمان مافی دروست کردنی حکومەتمان هەیە، با سەرۆک وەزیرانیش لە یەکێتی بێت، هەڤاڵێکی مەکتەبی سیاسی جگەلەوەی لە مەکتەبی سیاسی زۆر دژی ئەم بۆچونە بوە، لە رۆژنامەی (الشرق الاوسط) رایگەیاند :"ئێمە لە پشتەوە خەنجەر لە پارتی نادەین"، بەم کارەی ئەو هەوڵە لەباربرا بۆ دەرهێنانی حکومەت لە دەستی پارتی بەشێوەیەکی یاسایی.
دوابەدوای ئەوەش کاک نەوشیروان سەردانی کۆمەڵی ئیسلامی و یەکگرتوی ئیسلامی کرد و هەمان پێشنیازی خستەبەردەمی هەردو هاوپەیمانەکەی سەرەمی ئۆپۆزیسۆن، پێی وتن کە (24) کورسی گۆڕان (10) و (6) کورسی کۆمەڵ و یەکگرتو، دەتوانین ببینە هاوپیەمانیەکی (40) کورسی و ئەوکاتە بەشێوەیەکی یاسایی ئێمە رادەسپێردرێین بۆ پێکهێنانی حکومەت؛ بەڵام برایانی کۆمەڵ و یەکگرتوش بە بیانوی ئەوەی پارتی کێشەیان بۆ دروست دەکات ئەو پیشنیازەیان رەت کردەوە.
تەنانەت کاک نەوشیروان پێی وتبون ئەمەی ئێوە لە مەبدەئی شەیتان پەرەستەکان دەچێ، بەبیانوی ئەوەی رەحمان بە رەحمە و ئازاریان نادا، موجامەلەی شەیتان دەکەن و قسەی پێ ناڵێن.


(2)
لە دوای رێککەوتنە ئاشکراکەی گۆڕان و پارتی، لە میدیاکانی یەکێتی و کۆمەڵ و یەکگرتوەوە کادیر و پەرلەمانتارەکانی ئەو لایەنانە بەبەردەوامی پەلاماری بزوتنەوەی گۆڕان دەدەن، نامەوێ بچمە وردەکاریی ناوەڕۆکی پەلامارەکانەوە، چونکە ئەوە زەمەن دەری دەخات کێ راستگۆیە لە گەڵ پرەنسیپ و باوەڕەکانی و کێ موجامەلەی سیاسی پێدەکات و لەچاوتروکانێکدا دەستبەرداریان دەبێ.
- بە نسیبەت یەکێتی یەوە، لە رۆژی هەڕەشەکە و گەڕانەوەیان بۆ ناو پەرلەمان ئیتر پرەنسیپی (لە پێناوی بەرژەوەندیدا بێ دەنگ دەبم)یان هەڵبژارد..
- کۆمەڵی ئیسلامی خۆشیان نەیانشاردوەتەوە بۆ چونە ناو حکومەت لە ئاو (شل)ترن و چاوەڕوانی وەڵامی پارتین، بەڵام سەرەڕای پێداگریی زۆری گۆڕان بۆ ئەوەی ئەوانیش بێنە ناو حکومەتەوە، پارتی تا ئێستا رازی نییە، کەواتە بەرازی بونی پارتی، ئایەتی (یُبَدِّلُ اللَّهُ سَیِّئَاتِهِمْ حَسَنَاتٍ) جێگەی رەخنەکانیان لە گۆڕان دەگرێتەوە.
- یەکگرتوش، کە هەرلەسەرەتاوە ئۆپۆزسیۆن بونی هەڵبژاردوە، بۆ راستکردنەوەی هەڵەو کەموکوڕییەکانی ناوخۆیان و راکێشانی هەست و سۆزی جەماوەرە لەدەستچوەکەیان هێندەی پەلاماری بزوتنەوەی گۆڕان دەدا، نیو هێندەی روی قسەیان لە پارتی نییە. یەکگرتویەک کە لە کاتی کۆبونەوە یەکلاکەرەوەکەی خوێندەوەی دوەم بۆ هەمواری یاسای سەرۆکایەتی هەرێم، (پێنج) پەرلەمانتاریان بە زەقی دژایەتیان کرد و کۆبونەوەکەیان لەباربرد ئێستا بۆ شینی یاسایەک دەکات کە گۆڕان بە تەنها توانیویەتی لە رێککەوتننامەیەکی روندا یەکێک لە داخوازییە هاوبەشەکانی هەرچوارلایەنەکە بەسەر پارتیدا بسەپێنێ کە پرەنسیپی هەڵبژاردنی سەرۆکی هەرێمە لە ناو پەرلەمانەوە.


(3)
بزوتنەوەی گۆڕان، توانی کۆمەڵێک پرەنسیپی ئیسڵاحی بکاتە کارنامەی حکومەتی داهاتوی هەرێم، لەگەڵ پارتی کات و رێوشوێنیان بۆ جێبەجێکردنیان داناوە، لە ماوەی ساڵێکدا گەر هاتو حکومەت جێبەجێی کردن، خێر عەلالخێر، کە پارتی نەچوە ژێر باریەوە و خۆی لێ دزیەوە، گۆڕان نانی بەتەنورەوە نەسوتاوە، هەر بە پێی رێککەوتننامەکە گۆڕان دەتوانێ بکشیتەوە و خەباتی ئۆپۆزسیۆنی هەڵبژێرێ.
گرنگترین شتێک کە گۆڕان لەو رێکەوتنەی لە گەڵ پارتی کردویەتی، ئەوەیە بە تەنیا توانی سەرۆکی هەرێم لە ئاسمانەوە بێنێتەوە ناو پەرلەمان و بیخاتە بەر رەحمەتی چاودێری پەرلەمانتارانەوە، دەبا لەمەولا ئەو حیزبانەی دژی گۆڕان قسەیان دەکرد، مەجامەلەی نەکەن و ئازایانە و ئازادانە بتوانن لێپرسینەوە و لێپێچینەوەی لە گەڵدا بکەن و کەس دەستیانی نەگرتوە.
زۆرترین بینراو
© 2018 Awene Online, Inc. All Rights Reserved.
×