زەرورەتی ئەنجامدانی ھەڵمەتی (ھەرەوەزی) بۆ ئاگربڕکردنی دارستان‌و پاوانەکانی کوردستان

عه‌زیز محه‌مه‌د
  2019-05-10     151

ڕونكردنەوەو پێشنیار بۆ سەرجەم لایەنە بەرپرسەكان‌و خەڵكی كوردستان
نکولی لەوە ناکرێت کە ساڵانە لایەنە پەیوەندیدارەکان ( بەتایبەتی فەرمانگەکەنی کشتوکاڵ و ھەندێک ڕێکخراو) و خەڵک بە شێوەی ھەرەوەزی یان یەک یەک بە مەبەستی پاراستنی دارستان و باخ و دەغڵ و دان کاری ئاگربڕ ئەنجام دەدەن و بە ئەندازەی زانستی بوون و چۆنێتی و قەبارە و کاتی ھەڵمەتەکە کاریگەری خۆیان ھەبووە.
بەڵام بەپێی لێکدانەوەی من کۆمەڵێک ھۆکار ھەن کە وا دەکەن ئەم پرۆسەیە لەم ساڵدا گۆڕانکاری جددی بەسەردا بێت و وەک ھەڵمەتێکی (ھەرەوەزی) و سەرتاسەری و زانستی ئەنجام بدرێت لەوانە:
١. زیادبوونی ئاسۆیی و ستوونی گژوگیا، کە دەبێتە مایەی ئەوەی وزە و توانایەكی تری پێویست بیت و ڕۆتینی ساڵان ناكارساز بێت.
٢. گەیشتنی پرۆسەی سەوزکردنی کوردستان بە ئاستێکی بەرزتر (کە حەیفە بەھۆی بێپلانی یەوە بگەڕێتە دواوە).
٣. زیادبوونی گرژی و ئاڵۆزی یە نێودەوڵەتی و ناوچەیی و ناوخۆیی یەکان ( کە ئەگەری بێ ئەملاولای ئاگرکەوتنەوەیان پێوە دەبێت).
٤. کەموکورتی و نازانستی و ناکارسازی (بگرە خراپ کەوتنەوەی) ھەندێک لە ھەوڵ و ماندوبونەکانی ساڵانی تر (بەتایبەتی ھەوڵە فەردی یەکان).
ھەربۆیە بە پێویستی دەزانم لێرەدا ئەم پێشنیارانە بخەمەڕوو، کە ھیوادارم خوێنەران و لایەنە پەیوەندیدارەکان بە جددی وەریبگرن و لەماوەی ھەفتەیەکدا ھەڵوێستی خۆیان و ئەوکارانەی کە ئەتوانن لەو ھەڵمەتەدا ئەنجامی بدەن ڕابگەیەنن:
پێشنیارەکان:
١. ھەڵمەتەکە دەبێت ھەرەوەزی بێت، بۆ ئەوەی:
 - وزە و توانا و ئیمکاناتی پێویست بۆ پرۆسەکە ھەڵبخڕێنرێت.
-  ببێتە ڕوداوێکی سەرتاسەری و وانەیەکی کۆمەڵایەتی بۆ ھەست بە (بەرپرسیارێتی) کردن.
٢. دەبێت ھەڵمەتەکە  دیراسەکراو بێت، بۆ ئەوەی:
-  ئامانجە دیاریکراوەکانی خۆی بپێکێت.
-  لایەنە پەیوەندیدارە مرۆیی و ئیداری و زانستیەکان ئەرکەکانی خۆیان وردتر دەسنیشان بکەن و ئەنجامیان بدەن.
لایەنە پەیوەندیدارەکانی ئەم ھەڵمەتە کێن؟
بەبۆچونی من لایەنە پەیوەندیدارەکان بریتین لە:
١.  سەرجەم دەزگا حکومیەکان کە پارە و ئێمکاناتیان لەژێردەستدایە (چ لە ئاستی ھەرێمدا بن یان لە ئاستی شار و شارۆچکەکاندا).
٢. وەزارەتی کشتوکاڵ و بەڕێوەبەرایەتیەکانی.
٣. کۆلیژ و پەیمانگا کشتوکاڵیەکان ( کە پسپۆڕ و شارەزاکانیان تیادایە)
٤. پۆلیسی دارستان ( کە زانیاری یان لایە). 
٥. ڕاگەیاندنەکان ( کە توانای گەیاندن و ڕونکردنەوەی چۆنێتی ھەڵمەتەکەیان لایە)
٦. ئەو ڕێکخراوانەی ( کە بەناوی ژینگە پارێزی یەوە بوجە وەردەگرن)،....
٧. خەڵكی لادێكان (كە سوودمەند دەبن لە ھەڵمەتەكە).
٨. كەسانی خۆبەخش (كە لە ھەڵمەتەكەدا ھەلیكیان بۆ سەلماندنی ھەست بە بەرپرسیاریتی و ئاستی وشیاری و مۆراڵ دەستدەكەویت).
ئەرکی لایەنە پەیوەندیدارەکان چیە؟
١. لایەنە ڕەسمیەکان بەپێی بەرپرسیارێتی خۆیان ئەرکە ماددی و مەعنەویەکانیان لەڕووی دابینکردنی پارە و کەرەستە و مەکاین و شارەزاییەوە جێبەجێ بکەن.
٢. مامۆستایانی بواری کشتوکاڵ بە گشتی و بواری دارستان و پاوان بە تایبەتی سیمینار و ڕێنمایی و پلاکارت و زانیاری پێویست بۆ زانستی کردن و سەرخستنی ھەڵمەتەکە ئامادە بکەن.
٣. ڕاگەیاندنەكان بایەخ  بە ھەواڵ و كار و ڕێنمایی و چالاكیەكانی ھەڵمەتەكە  بدەن بڵاویان بكەنەوە.
٤. خەڵكی لادێكان و كەسانی خۆبەخش ڕێكبخرین بۆ ئەوەی كارەكانیان بەشێوەی زانستی ئەنجام بدەن.

عزیز محمد/ مامۆستای زانكۆ
6 ی ئایاری 2019
زۆرترین بینراو
© 2018 Awene Online, Inc. All Rights Reserved.
×