ھەق نییە وا بێ!

د. سالار عوسمان
  2019-08-06     571

- چەند ڕۆژێکە بە وردی تاقیبی ڕوماڵ و بڵاوکردنەوەی ھەواڵەکانی ساڵیادی ئەنفالی بارزانییەکان و ساڵیادی کارەساتی شنگال دەکەم، کە دوو ڕووداوی ھێندە ناخھەژێنن، ھەقە، نەک ھەردوو حزبی کوردی: (پارتی و یەکێتی)و ھەموو کوردستان، بەڵکو، ھەقە تەواوی ناوچەکە و جیھان و ویژدانی مرۆڤایەتییش بەیەکەوە، لەسەر یەکڕاستەڕێ، ڕاستەڕێی ئینسان و مافەکانی، ئینسان و یەکسانی، ئینسان و دیموکراسی، ئینسان و ڕەتکردنەوەی ستەم و بێدادی کۆبکاتەوە !..


- ئەوەی من بینیم، ڕاگەیاندن، نەک ھەر لە ئاستی گەورەیی ئەم دوو یادە مەزنەدا نەبوو، بگرە پیشەییانەیش بەرخوردی نەکرد، واتە دەستکورت، دەستکورت لە ئاست باڵایی ئەو دوو ڕووداوە مایەوە و نەیتوانی لەھەردوو ڕوانگە ئینسانی و پیشەکە باش بەرخورد بکات، کە دەکرێ وەک دوو پرسی شوناسی، بەرخوردی فرەڕەھەندی ئامانجدار و بەرھەمداری لەتەکدا بکرێت و، ئاکام، دونیا و ڕای گشتی ڕاکێشێتە نێو واقیعی کوردستان، واقیعێک، کە ئێمە لە نێوخۆماندا چەند حەوجەمان بە تاریف و شەرح و شرۆڤە و ھەڵێنجانی حەکیمانەیە، دونیا سەد ھەندە و پتریش، لێ نە ئەمەمان کرد و نە ئەوە و، کورد وتەنی: ئەمیشم چوو، ئەویشم چوو !..


- ھەر لە نێو ئەو تاقیباتەدا، (ڕۆژنامەی خەبات، کوردستانی نوێ و ھەولێر)ی ڕۆژانی پئنجشەم و یەکشەم و دوێنێشم سەیرکرد، سەرەڕای ئەوەی بابەت و لێکۆڵینەوە و شرۆڤەیەکی وردم تیا نەبینی، ئەوەیش قەینا، کە ھەرگیز نابێ بڵێین قەینا، بڵاوکردنەوەی ھەواڵەکانیش ھەر بەو دەردە چووە، دەردی بچووک
بیرکردنەوە، ئەو دەردەی واز لە کورد، لە نێویشیاندا واز لە ڕاگەیاندنی کوردی ناھێنێت!. بەکورتی تەنێ بە ھەواڵ ئیکتیفایان کردووە، لێ چ ھەواڵێک و چۆن و بە چ تێگەیشتنێک؟!..

 

- مخابن لە ژمارەی ئەم چەند ڕۆژەدا، ڕۆژنامەی کوردستانی نوێ ھیچ ھەواڵێکی سەرۆکی ھەرێمی کوردستان و سەرۆکی حکومەتی ھەرێمی کوردستانی لەو دوو یادە گرنگەدا بڵاو نەکردۆتەوە، کە یادێکن، وەک پێشتر گوتمان، دەبوا ھەمووان لەسەر یەکڕاستەڕێدا کۆبکاتەوە!. ڕۆژنامەی کوردستانی نوێ ئەم یادانە تەنیا لە ھەواڵ و پەیامی جێگری سەرۆکی حکومەتی ھەرێمی کوردستاندا دەبینێتەوە، ڕۆژنامەی ھەولێریش ھەر وای کردووە و ھەواڵی جێگری سەرۆکی حکومەتی ھەرێمی کوردستانی بڵاونەکردۆتەوە و تەنیا ڕۆژنامەی خەبات نەبێت، کە پەیامێکی جێگری سەرۆکی حکومەتی ھەرێمی کوردستانی بڵاوکردۆتەوە، بە کورتی ئەم ڕۆژنامانە، کە ھی ھەردوو حزبە سەرەکییە حوکمڕانەکەی کوردستانن، ھەواڵ و ڕووداو و تەنانەت دامەزراوە ڕەسمی و شەرعییەکانی کوردستانیشیان بەلاوە گرنگ نییە!. 


- دەبێ ڕاگەیاندن، وڵات و دامەزراوەکان و ھەواڵەکانیان بە ھەواڵ بزانێت و خۆی لەو جەھلە: (جەھلی بە ھەواڵ نەزانینی ھەواڵ!..) ڕزگار بکات و پیشەییانە و وڵاتبینانە بەرخورد بکات، دەبێ ڕاگەیاندن خۆی لەم تاعونی بچووک بیرکردنەوەیە دەرباز بکات!. کورتتر لەمە دەمەوێت بڵێم: ڕاگەیاندنی نیشتمانێکی جینۆسایددیدەی ھەڕەشەلەسەر، دەبێت گەورە بیر بکاتەوە و گەورە ببینێت و گەورە کار بکات!..


- خەمی جددی لەم وڵاتەی ئێمە ھەن و دەبێ باسیان بکەین و چیتر موجامەلەی یەکتر نەکەین، مام ھەژار موکریانی لەبارەی موجامەلەوە قسەیەکی جوانی ھەس و دەڵێت: (موجامەلە فیتنەیە!..)، با چیتر فیتنە تەقدیمی یەکتر نەکەین، بۆیە پێویستە بە باش بڵێین باش و بە خراپ بڵێین خراپ، بۆیە ئەوەی ئێستا ڕاگەیاندنی پارتی و یەکێتی دەیکەن، تایبەت لە مامەڵەکردن لەگەڵ ئەم دوو یادە مەزنە ناخھەژێنە، خراپە و دەبێ پێیان بڵێین: خراپتان کرد و ھەق نییە وابێ!



ئه‌م وتاره‌ له‌رۆژنامه‌ی‌ هه‌ولێر بڵاوكراوه‌ته‌وه‌

زۆرترین بینراو
سۆران عومه‌ر: به‌دواداچوونێكى ورد ده‌ریخست ئامانج بابانى بكوژى هاوسه‌ر و منداڵه‌كه‌ى و خۆیه‌تى
په‌لەمانتارێکى پارتى: دوای ڕۆژئاوای کوردستان ئاڕاستەی دژایەتی تورکیا بەرەو ڕوی هەرێمی کوردستانە
به‌ڕێوه‌به‌ری پێشووی CIA: له‌ ئه‌نجامدا به‌ریتانیا و فه‌ڕه‌نساش کورده‌کان به‌جێده‌هێڵن
سیناتۆرێکی ئەمریکی: بۆ تەمبێ کردنی تورکیا پێویستە هەم گێزەر و هەم تێڵا بەکار بهێندرێت
سەركردەیەكی پارتی: تورکیا ناتوانێ ئەو بەرنامە چەپەڵەی بۆ رۆژاڤا دایناوە جێبەجێ بکات
وەفدێكی سەربازیی روسیا گەیشتە قامیشلۆ
داوا ده‌کرێت 40 هەزار سەربازی وڵاتانی ئەندام لە یەکێتی ئەوروپا رەوانەی رۆژئاوای کوردستان بکرێت
لەمڕۆوە بە بەردەوامی كامێرای چاودێری لەڕێگایەك دادەنرێت
شاسوار عەبدولواحید: ئەم دۆخە دەبێتە بازدانێکی گەورە بۆ بەرەوپێشبردنی دۆزی کورد
ئەسەسەرد: گەر تورکیا ئامانجەکانى لەباکورى سوریا پێکا، ئەوا بیر لە فراوانکردنى سیناریۆکە دەکاتەوە
© 2018 Awene Online, Inc. All Rights Reserved.
×