لانەو ئامانج لەچەقی ڕاستیە تاڵەکانی تردا!

د.هەژار مه‌عروف
  2019-11-01     8673

لاشەی ئامانج بابانی و لانەی ژنی و هامۆی کۆڕیان  ئێوارەی ڕۆژی ١٦ ی ١٠ ی  ٢٠١٩ لەناو ئوتومبیلێکدا لە جادەیەکی شاری سلێمانی دەدۆزرێنەوە. خورپە و خەم، هاوسۆزی و توڕەیی ، ترس و نیگەرانی، تۆمەتی بێبەڵگە ، سوکایەتی و جنێوی پیسی نەبیستراو وەک هەورەبروسکە سۆشیال میدیاکان داگیردەکات. 

پێش ئەوەی چاوەڕێی ئەنجامی  لێکۆڵینەوەی تاوانناسی و پزیشکی دادوەری بکرێت دەمودەست تەلەفیزۆنی NRT دەڵێت تیرۆر کراون و دەیخاتە چوارچێوەی کوشتنی ڕۆژنامەنوسان. وتەبێژی  حکومەتی هەرێم (جوتیار عادل) دەلێت دراونەتە بەر دەسڕێژی گولە (واتە کەسی تر کوشتونی) ، سەرۆکی پەرلەمانی کوردوستان (ڕێواس فایق) ڕوداوەکەی بە  کارێکی تیرۆریستی وەسفکرد (واتە کەسی تر کوشتونی ). پۆلیس و ئاسایشی سلێمانی بە پەلە و پەشۆکاوی کۆنگرەیەکی ڕۆژنامەوانی دەبەستن و دەڵێن ئامانج لە پێشدا ژن و منداڵەکەی کوشتوە  ئینجا خۆی. هەمو ئەم هەڵوێستانە جگە لە لایەنی باشی هاوسۆزی و بەزەیی بە سێ مردوەکە، بەڵام بەداخەوە لایەنی نەباشی وەک بەسیاسیکردن، گومان و بێبڕوایی ، هەڵچون و توڕەیی،  نەزانی و نەشارەزاییان پێوە دیاربو، هەمو ئەم بیروڕا و هەست و سۆزە نەباشانە دەتوانین بیانخەینە بازنەی سێ ڕاستیی بنەڕەتیەوە کە بونەتە سیمای زەقی دەسەڵاتی پارتی و یەکێتی :

۱ . کێشەی بێبڕوایی بەم دو حیزبە، خەڵک لە ڕوداوێکی وادا ڕابوردوی ئەم دو حیزبەیان دێتەوە یاد و بە گومانەوە دەپرسن: کوا ئەنجامی کۆڵینەوەکانی کوشتنی (سۆرانی مامە حەمە) و (شێخ ستار) و (سەردەشت عوسمان) و (کاوە گەرمیانی) و شەهیدانی ۱۷ی شوبات  (ڕێژوان و سورکێو و ...) و (ویداد حسەین)؟ خەڵک دەڵین ئەم دو حیزبە ڕەحم بە ئەندام و سەرکردەکانی خۆشیان ناکەن ، خەڵک دەڵێن پارتی و یەکێتی بەرامبەر خۆمان (نەک بەرامبەر ناحەزان و دوژمنانی ناکورد!) هەمو ڕەفتارێکی دڵڕەقی و بێبەزەییانەیان لێدەوەشێتەوە  ،هەمو تاوانێکیان لە دەست دێ و لە هیچ سڵ ناکەنەوە و ناپرینگێنەوە . خەڵک  دەپرسن ئەفسەری باڵای دەسگای جاسوسیی  پارتی (سەرکەوت نەجەفی) چۆن و بۆ لە ناوچەی ژێر دەسەڵاتی پارتی کوژرا ؟ کێ کوشتی؟ ئەی (فەرەیدون جوانڕۆیی) ی ئەندامی مەکتەبی سیاسیی پارتی و بەرپرسی بەرەیەکی گرنگی شەڕی دژی داعش کێ کوشتی؟ بۆ کوشتیان؟ (زانای قایمقام) ی سلێمانی کە لە ناو زیندانی ئاسایشی سلێمانی بە خنکاوی دۆزرایەوە، چۆن مرد؟ (سەروەت ) کە  ئەفسەری حیمایەی زۆرنزیکی مامی ڕەحمەتی بو چۆن و بۆ کوژرا؟ ئەی یەک دوڕۆژ دواتر ئامۆزاکەی چۆن و بۆ کوژرا؟

۰۲کیشەی دێرین و بەردەوامی ڕکابەریی نێوان پارتی و یەکێتی لە سەر دەسەڵات لە کوردوستان.نوسەر و ڕاگەیاندکار و ڕۆژنامەنوس، دەستە و دەسگا  نهێنی و ئاشکراکانی ئەم دو حیزبە لە هەمو جۆرەکانی میدیا و لە سەر جادە و ناو کۆڵان و لە چایخانەکاندا لە دژی یەکتری لە کاری بەردەوامدان، هیچیان پێ خەوش نیە، کێچ دەکەنە فیل و فیل دەکەنە کێچ، یان هەر لە هیچی نەبو فیل و حوشتر دروستدەکەن و چیرۆکی دزێو و کرێش و هەژێنەرهەڵدەبەستن !

٣. کێشەی نەبون یا کەمبونی  شارەزا و پسپۆڕی لێهاتو و هاوسەنگ ، ئازا و ئازاد و ناحیزبی لە شوێنە ستراتیجی و هەستیارەکانی حکومەتی هەرێم کە بوێرانە و بەویژدانانە  بێ دەستێوەردانی دەسەڵاتدارانی پارتی و یەکێتی کارەکانیان ئەنجام بدەن. دەسەڵاتدارانی پارتی و یەکێتی ناهێڵن کەسانی مرۆڤدۆست و پاک و خۆنەویست و دڵسۆز بۆ گەڵ ونیشتمان  بخەنە دەسگا هەستیارە کانی حکومەتی هەرێم لە وەزیر (وەزیری وزە و سامانە سروشتیەکان) و سەرۆکایەتیی پەرلەمان وسەرۆکی لیژنە پەرلەمانیەکان، دەسەڵاتی دادوەری و ئاسایش و ڕاوێژکار و بەڕێوەبەری گشتی و بەڕێوەبەرەکان، ئەگەر هێشتیشیان ئینجا ناهێڵن پیشەییانە و دادپەروەرانە و دڵسۆزانە بۆ سودە  گشتیە هاوبەشەکانی خەڵک بڕیاربدەن، ئەم جۆرە کەسە دڵسۆز و بەهەڵوێست و پسپۆڕانە هەن و زۆریشن بەڵام ناتوانن مەرجە قورسەکانی  دەسەڵاتدارانی هەردو حیزب قوبوڵ بکەن، بۆیە یان هەر ناچنە ناو کایەی کێبەرکێ بۆ پۆستەکان یا هەرزو دەکرێنە دەرەوە، یان پاش ماوەیەکی کەم لە پۆستەکانیان دوردەخرێنەوە، ئاشکرایە کە کێبەرکێ و سی ڤی پێشکەشکردنیش بۆ پۆستەکان شانۆگەرییەکی بێواتا و بێتامە چونکە پێشتر لە کۆبونەوە نهێنیەکاندا بڕیارلەسەر پۆستەکان دراوە. ئەمەیە کە دەبێتە هۆی کەمی یا  هەر نەبونی متمانە و بڕوا بە تایبەتی بە  کاربەدەستانی  پۆلیس و ئاسایش و هەواڵگری و دادگاکانی هەرێم.

بنەماڵەی (لانە) دەڵێن ڕوداوەکە کۆمەڵایتی بوە و پەیوەندیی بە بابەتی سیاسی و ڕۆژنامەوانیەوە نەبوە، لانەی کچیان ویستویەتی لە ئامانج جیابێتەوە بەڵام  ئەم نەیویستوە، کەیسەکەیان پێنج مانگ بوە لای دادگا بوە، ئەوان ڕەخنەی توند لە کەناڵی NRT  دەگرن کە ڕاستیەکان دەشێوێنێ ودەیەوێت لەسەر حسابی ئێش و ئازاری ئەمان سودی سیاسی لە ڕوداوەکە ببینێ. 

چەند هاوڕێیەکی نزیکی لانە و ئامانج قسەی بنەماڵەی لانە پشتڕاست دەکەنەوە تا ئەو ئاستەی دەڵێن ئامانج چەند جارێ وتویەتی ئەگەر لانە جیابێتەوە ئەو و خۆیشی دەکوژێ. من وەک دوکتۆرێکی دەرونی، لە ئەڵمانیا و لە وڵاتانی تری دنیاش بینیومە و بیستومە و دەزانم کە پیاو بە گشتی (تەنانەت پیاوی ئەوروپی) ش  زۆر زۆر بەلایەوە قورسە  قوبوڵی ئەوە بکات کە ژنەکەی یەکلایەنە لێی جیابێتەوە، هەر لە هاوینی ئیمساڵدا بینیمان مێردێک لە سەر ئەمە لە هەولێر ژنەکەی خۆی کوشت و پیاوێکی تر لە  سلێمانی کە ژنەکەی لێی جیابوبۆوە لە هەوڵێکیدا بۆ کوشتنی بە سەختی برینداریکرد. 

ئەم جۆرە جیابونەوە یەکلایەنەی ژن لە کۆمەڵی پیاوسالاریی کوردوستاندا هەست و شعوری زۆر قوڵ و ناسکی نیرگسییانەی پیاو بە سەختی برینداردەکات و بۆی هەیە لە کۆترێکی ئاشتیەوە بیکات بە داڵێکی برسیی هەڵمەتبەر، لە پەپولەیەکەوە بیکاتە زەردەواڵەیەکی ژەهراویی بکوژ، خۆ ئەگەر پیاوەکە ناو و ناوباگێکیشی هەبو ئەوە ئیتر برینداربونەکە کاریگەرتر و پڕئێشتر دەبێت، کاردانەوەکەش توندتر و خراپتر. (ئێریک فرۆم) ی شیکەرەوەی دەرونیی ناوداری ئەڵمانی لە نوسینێکیدا لە سەر نێرگسییەت دەڵێت ئەم جۆرە لە نێرگسییەت شەڕ وکارەسات و توندوتیژیی لێدەکەوێتەوە. 

لەم کارەساتەدا ناکرێت و ناڕەوایە ڕاوبۆچونی بنەماڵەی لانە و هاوڕێ نزیکەکانی هەردوکیان بەهەند وەرنەگیرێن، ناکرێت و ناڕەوا یە ڕاپۆرتی پزیشکی دادوەری پشتگوێ بخرێت. دەبێت ئەم دو پرسیارە بکرێت: بۆچی پرسە و ناشتنی مردوەکان بەجیا ڕێکخران؟ ئایا لە بنەماڵەی ئامانج دا کەسێکی بوێر نەبو کۆنفرانسێکی ڕۆژنامەگەری بگرێت و بڵێت ئامانج خۆی نەکوشتوە بەڵکو کوشتویانە؟ 
ناکرێت و ناڕەوایە بێ بەڵگەی ڕون و بەرجەستە بوترێت لانە و ئامانج و هامۆ کەسی سێهەم کوشتونی.  

زۆرترین بینراو
© 2024 Awene Online, Inc. All Rights Reserved.
×