کۆبوونەوەیەکی کراوە لەگەڵ :ی ن ک، پ د ک، ب گۆڕان

د. ساماڵ مانیی
  2019-11-05     163
 وەکو خۆتان ئاگادارن، لە مێژە  پەیوەندیم بە لایەنی پەیوەندیداری ناو هەرسێ لە حیزبەکانتانەوە کردوە بە مەبەستی کردنی پرۆژەیەکی زۆر سوودبەخش، زۆر لەمێژە  داواکاریم  بۆ کردنی پرۆژەکەم ناردوە، لە مێژە گفتوگۆی تایبەتم لەگەڵ کردوون  سەبارەت بەم پرۆژەیە و داوام لێکردوون کە ڕێگەم بدەن هەندێک چاکسازی لە ژینگەی زانکۆکاندا بکەم بە جۆرێک کە هەموو زانکۆ حکومی و ئەهلیەکان سوودی لێببینین بە بێ جیاوازیتان، پێم ڕاگەیاندوون کە پرۆژەکە پێویستی بە بودجە نیە  و بە بێ کێشە ، بێ ئاڵۆزی و شەڕکردن و تۆڵە و بەزم و ململانێ ی سیاسی دەکرێت.
 سڵاو لەو بەڕێزانەی لەناو هەرسێ حیزبەکەدان و کەسانی باش و خاوەنی پرنسیپی باشن وەک کەسایەتی،  بەڕێزان حیزبەکانتان لە ئێستادا حکومەت بەڕێوەدەبەن، ئەوانەتان کە خەمخۆری چاککردنی زەمینەی ژیانن لە کوردستانا و هەروەهاش لە خەمی چاککردنی زەمینەی زانکۆکانن؛ هەر کامەتانن، هەر لە ترۆپکی دەسەڵاتەوە هەتا مامۆستای ناو زانکۆکان و خوێندکاران و فەرمانبەران.  تکایە گوێ لەو کەمایەتیەی ناو حیزبەکانتان مەگرن کە کەسانی  دژە ژنن و کەسانی دڵڕەش و نەزانن لەم مەسەلانەدا وچیتر دڵیان ڕامەگرن، ئەوانە دڵڕەشی و ڕق و  بوغز و کینە  و بیری دژە ژنی خۆیان – ئەڵبەت جگە لە ژنانی ناو خێزانەکانی خۆیان و رەفیقەکانیان- بەسیاسەتکردن و دڵسۆزی  بوون دەفرۆشنەوە پێتان و هەڵتاندەخەڵەتینن، ئەوانە؛ نە لە سوودی حیزبەکانتانن و نە لە سوودی حکومەت دان و نە لەسوودی هاووڵاتیان، خۆشتان دەزانن کە ئەوانە تەنها زەرەرن و سواری کۆڵی حیزبەکان دەبن و لێیان نابنەوە بۆ دەستکەوت و پێگەی خۆیان.
  لەبری ئەوە، بفەرموون گوێ لە ویژدان و پرنسیپی چاکەی  ناو تۆڕی باوەڕ و هەڵوێستەکانی خۆتان بگرن، ئەو پرنسیپە باشانەی کە هەتانن بەکاریان بهێنن، بە چاوێکی کراوەوە  سەیرێکی ژینگەی دەوروبەرتان بکەن ، ببینن چۆن پڕە لەکەسانی حیزبیی  بێسوودی  دەمهاوێژی دژە ژن (جگە لە دایک و خوشک و ژن و کچەکانی خۆیان و رەفیقەکانیان)  بیانبینن کە چۆن زەرەر بەخشن،  ببینن کە ئێوە چۆن  ولەکوێدا جیاوازن لەوان لە تێڕوانیناندا، ئەو جیاوازییە لەوان بریتیە لەوەی کە ئێوە هەڵگر و خاوەنی پرنسیپی باشن، ئەو پرنسیپە باشانە لە ناختانا مەکوژن.
  پاش ئەو چاوکرانەوەیە  بەسەر قسەکردن و هەوڵی ڕێگەگرتن و باسکردن و داواکاریە خراپەکانیاندا  بچنەوە ، بیانبیستن کە چۆن لە قسەکردن و ڕاوێژیاندا و داواکاریەکانیاندا  پڕن لە ڕق و بوغز و کینە و بەدڕەوشتی و بەدکاریی و پڕ ڕاپۆرتی  بە خراپە باسکردن و بەدناوکردنی خەڵکن  و هەموو ئەمەش بە سیاسەتکردن و بە 'دڵسۆزیی حیزبی' دەفرۆشنەوە پێتان.  ئەوانە لە حەسانەی بە حیزبی بوون دەربهێنن و  وەکو خۆیان ببینن، ئینجا سەیری دەوروبەری خۆتان بکەن بە چاوێکی ناحیزبیانە و جیاکارییەوە و ببینن  کەچۆن  کەسانی ناحیزبی هەن زۆر سوودبەخشترن لە کەسانی حیزبی خراپ و بەد، چەند کەسانی ناحیزبی هەم لەناو کورددا کە زۆر بە توانان و دەتوانرێت توانا و هەوڵ و ئەزموون و تێگەیشتنیان بەکاربێت لە یارمەتی چاککردنی ژینگەی ژیان و ژینگەی ئەکادیمی،  کورد و هەموو دامو دەزگایەکی پەیوەندیدار سەربەرز بن بە کارەکانیان.
  بەڕێزان لە کەسایەتیە باشەکانی ناو حیزبەکان و دەرەوەی حیزبەکان، هەموو دەزانن و بیستوتانە کە ژینگەی ئەکادیمی ژن خراپە لەناو زانکۆکاندا،  لەگەڵ ئەمەدا خۆتان دەزانن کە هەر یەک لە ئێوە تا ڕادەیەک دەسەڵاتی هەیە لە ڕێی  پێگەی ئیشکردنی خۆیەوە، ڕێگەبکاتەوە کەسانی شارەزا و بێ لایەنی ئەکادیمی لەڕەگەزی مێینەی کورد پرۆژەی چاککردنی ژینگەی ئەکادیمی ژن  لە زانکۆکاندا بکات. لەبەر ئەوەیە من داواتان لێدەکەم ئەو دەسەڵاتانەتان  بە جوڵاندنی پرنسپە باشەکانانتان کە دڵنیام هەتانن، بەکاربهێنن بۆ پشتگیری و ڕێکردنەوە  بۆ پەسەندکردنی پرۆژەکەم (پرۆژەی چاککردنی ژینگەی ئەکادیمی ژن لە زانکۆکاندا) کە هەر لەسەرەتای دەستپێکردنی پێکهێنانی حکومەتەوە پێشکەشم کردوە  چ بۆ حکومەت و چ بۆ وەزارەتی خوێندنی باڵا، وا نزیک دەبێتەوە لە تێپەڕبوونی  ساڵێک لە کاتی یەکەم هەوڵمەوە بۆ کردنی ئەم پرۆژەیە.
 من وەکو ژنە کوردێکی ئەکادیمی  و ناحیزبی بە ئەرکی سەرشانی خۆمم زانی و ئەم پرۆژەیەم پێشکەش کردوە، بیرۆکەی پرۆژەکە و بەڕێوەبردنی و سەرەنجامەکەی بێلایەنە و سوود بەخشە بە بواری گشتی ؛ واتە بە هەموو لایەنیک. من ژنێکی  ئەکادیمی ئۆنترۆپینێرم واتە سەرنج لە نەبوونی مەسەلەیەک دەدەم کە پێویستە هەبێت و ئەو نەبوونیە/ بۆشاییانە دەبینم کە هەن لەناو کۆمەڵگەکەدا و  پرۆژەی بۆ دروستدەکەم کە بۆشایی و نەبوونیەکە پڕ بکاتەوە و لە سوودی گشتیدا بێت.   ئەمە پێی دەوترێت 'ئۆنترۆپینێر' واتە پرۆژەی ئامادەکراو لە حیزبەکان وەرناگرم ، بەڵکوو من خۆم پرۆژە دەخوڵقینم و دەمەوێت  بیانکەم و بەڕێوەیان ببەم، بێگومان بە بێ پشتگیری ئێوەش ناکرێت، لەبەر ئەوەی ئێوەن لە دەسەڵاتدان نەک من. بۆ ئەم مەبەستەش  بێ سڵکردنەوە و بە سەربەخۆیی و بێ جیاکاری قسەم لەگەڵ هەموو لایەنێکتان کردوە بۆ باشکردنی ژینگەی ئەکادیمی ژنان لە هەموو زانکۆکانی کوردستاندا، ئەم پرۆژەیە سوودبەخشە بۆ هەموو زانکۆیەک بە بێ جیاوازی ئەوەی لە کام زۆنن و سەر بەکام حیزبەن و لە کوێی ململانیکاندان یان نین. 
بەڕێزان لە کەسایەتیە باشەکانی ناو کۆمەڵگەی کوردی لە حیزبی و ناحیزبیەکان، من لەوەپێشتر ئیشم لەو جۆرە پرۆژانەدا کردوە کە پرۆژەی چاککردنی ژینگەی ئەکادیمی ژنان لەناو زانکۆکاندا لە بەریتانیا و ئەورۆپا، وەک دەزانن من ئەندامی هەمیشەیی کۆمەڵەی فەیلەسوفەکانی بەریتانیام و ئەندامی ژنە فەیلەسوفەکانی بەریتانیام، ئێمە لەو کۆمەڵانەدا لەم مەسەلانەدا هەندێک ئیشمان کردوە و خۆشبەختانە لەو ڕوەوە بووم بە خاوەنی ئەزموون تیایدا. 
ئەم پرۆژەیە جێگەگرەوەی ئیشو کارە بەنرخەکانی هیچ کام لە رێکخراوەکانی ژنان و ئافرەتان وخانمانی کورد و سەنتەرە جێندەریەکانی ناو زانکۆکانی کوردستان نیە چ سەربەحیزبەکان بن یان نە، چونکە ئیشە باشەکانیان لای من جێگەی دڵخۆشی و بەهەندگرتنە. پرۆژەکەی من پرۆژەیەکی سنوردارە لە ڕووی کات و ئیشەکانیەوە، نزیکەی دووساڵێک دەخایەنێت و ئەنجامەکەی هەمیشەییە. ئەوەی من دەمەوێت بیکەم پرۆژەیە و جیاوازە لە دروستکردنی رێکخراوە ی هەمیشەیی و ئیشی ڕێکخراوەیی، واتە سەرباری ئیشەکانی ئەوانە ولە کۆتاییشدا یارمەتیدەری ئەوانیشە،  چونکە خزمەت بە هەموو ژن دەکات بە بێ جیاکردنەوەیان لە ڕووی  جیاوازی بیروبۆچوون و جیاوازی حیزبی و ڕێکخراوەیی ە سیاسەت و ململانێکانی نێوانیان. بۆیە دەمەوێت بڵێم من  پشت بە هەڵوێستی باشی کەسایەتیە باشەکانی ناو ئەوان و پشتگیرییکردنیان دەبەستم بۆ پەسەندکردن و تەواوکردنی پرۆژەکەم.
ئەوانەی کە سوودمەندن لەم پرۆژەیەی من پێشکەشم کردوە، ئەمانەن:
یەکەم: نیوەی کۆمەڵگەی کوردی، لە ڕەگەزی مێینەی خوێندکاران و مامۆستاکان و فەرمانبەرانی هەموو زانکۆکان لە ئێستا و لە داهاتوودا.
دوەم: هەموو زنکۆکان، بە زانکۆی  حکومی و ئەهلی و لەهەر کام حیزب و لەهەر زۆنێکی سیاسیدا بن، ئەوەی هەیە لە ئێستادا و ئەوەش کە دروست دەکرێن لە داهاتوودا.
سێیەم:  وەزارەتی خوێندنی باڵا بەگشتی سوودمەندە
چوارەم: هەموو کۆمەڵگەی کوردی سوودمەند دەکات، لەبەر ئەوەی زانکۆکان فیکر ئاڕاستە دەکەن لە کۆمەڵگەکەدا و چاککردنی ژینگەی فیکری ناو زانکۆکان بریتیە لە باشکردنی ژینگەی فیکریی لەناو کۆمەڵگەکەدا بە گشتی.
بودجەی پێویست: پێویستی بە هیچ بودجەیەک نیە، تەنیا ئەوەندەی خۆم بەڕێوەیببەم و ئۆفیس و دوو کارمەند لە یەکەمەکانی زانکۆکان کە بتوانن و شارەزا بن لەوەی پرۆژەکە پێویستەتی.
 ئەمە ناواخنی پرۆپۆزەڵی پرۆژەکەمە کە لەگەڵ سی ڤی تایبەت بە پرۆژەکەم پێشکەشکراوە 

لەگەڵ دڵسۆزیمدا بۆ هەموو حیزبیە باشەکانتان
زۆرترین بینراو
© 2018 Awene Online, Inc. All Rights Reserved.
×