بەڕێوەبەری پۆلیسی هەولێر دەستگیركردنی دو تۆمەتباری بە رفاندن و دزینی ئۆتۆمبێلێك لە گەشتیارانی عەرەب ئاشكراكرد كە بەناوی ئاسایشەوە لەگەڕەكی تەیراوای شاری هەولێر بازگەیان داناوەو ئۆتۆمبێلەكەیان بردوە.

ئاوێنە: پێشنیوەڕۆی ئەمڕۆ ئەمڕۆ شەممە، عەبدولخالق تەڵعەت، بەڕێوەبەری پۆلیسی پارێزگای هەولێر، لەكۆنگرەیەكی رۆژنامەوانیدا ، وردەکاری تاوانێکی ڕفاندن و دزینی ئۆتۆمبێلێکی بۆ دەزگاکانی ڕاگەیاندن خستەرو کە لە ڕۆژانی رابردو ئەنجامدرابو.

بەڕێوەبەری پۆلیسی هەولێر ڕایگەیاند، دوای ئاگادارکردنەوەی پۆلیسی نەهێشتنی تاوان لەروداوێکی ڕفاندن و دزینی ئۆتۆمبێل لە گەڕەکی تەیراوە، پۆلیس دۆسیەی لێکۆڵینەوەی بۆ ئەم ڕوداوە کردەوە و توانی لە ماوەی کەمتر لە (۲٤) کاتژمێر ناسنامەی تۆمەتباران ئاشکرا بکات و دەستگیریان بکات.

هێمای بۆ ئەوەش كرد كە تۆمەتباران بەناوی (ع.س.س.)، تەمەن (۲٦) ساڵ، (گ.ا.ب.) تەمەن (۲٦) ساڵ، دوای دەستگیرکردنیان دانیان نا بەتاوانەکەیان کەوا کاتژمێر (۱)ی شەو هەڵسابون بە دانانی بازگە بە ناوی ئاسایش، دواتر ڕفاندن و دزینی ئۆتۆمبێلێک لە جۆری (BMW) لە چوار هاوڵاتی بەڕەگەز عەرەب کەوا بە مەبەستی گەشتکردن هاتبون بۆ شاری هەولێر.

ئەوەشی خستەڕو كە پەڕاوی لێکۆڵینەوە بۆ كەیسەكە ڕێکخرا و ڕەوانەی بەردەم دادوەر کراو دادوەری بڕیاریدا بەبەندکردنی تۆمەتباران بە پێی ماددە (٤٤۲) لە یاسای سزادانی عێراقی.