بەهۆی ئەوەی ژمارەیه‌ک عەرەبی شارەكە لە كوردێكیان داوە و سوكایەتیان پێكردوە، عیسا سایر قائیمقامی فەلوجە داوای لێبووردن لە هەرێمی كوردستان دەكات.
ئاوێنه: عیسا سایر لە نامەیه‌كی كراوه‌دا بۆ هاوڵاتیانی هەرێمی كوردستان وسیویەتی: "ئەوەی روی دا چەند كەسێكی سەرخۆش بوون و دەستدرێژییان كردوەتەسەر خاوەنی خواردنگەیه‌ک، كە خەڵكی هەرێمی كوردستانە و رووداوەكەش درەنگانێكی شەو روی داوە".
قائیمقامی فەلوجە ئاماژەی بەوەش داوە، رووداوەكە دوو رۆژ پێش ئێستا بووە و دەستدرێژیكارانیش نوێنەرایەتیی خەڵكی فەلوجە ناكەن، بەتایبەت كە شارەكانی هەرێمی كوردستان باوەشی بۆ كردنەوە، ئەو كەسەش كە هاتە فەلوجە و خواردنگەی كردەوە پێشوازی لێكرا و حكومەتی خۆجێی رێوشوێنەكانی بۆ ئاسان كرد و رێگەی پێدا.
قائیمقامی فەلوجە تەئكیدیشی كردوەتەوە، ئەوەی رویداوە لە دەرەوەی رەوشت و هەڵسوكەوتی خەڵكی شارەكەیە، هەروەک دەڵێت: "بەناوی حكومەتی خۆجێی و خەڵكی فەلوجەوە داوای لێبووردن لە كەسوكارمان لە هەرێمی كوردستان دەكەین و شەو و رۆژ لەگەڵ خاوەنی چێشتخانەكەدا دەبم و لێپرسینەوەش لەگەڵ سەرجەم ئەو كەسانەدا دەكرێت كە دەستدرێژییان كردەسەری و دەستگیركراون و راپێچی دادگا دەكرێن، دووبارە داوای لێبووردن لە گەلەكەمان لە هەولێر و شارەكانی تری هەرێمی كوردستان دەكەین، كە هاوكارییان كردین لە مەینەتی و ئاوارەییدا".
پێش چەند رۆژێک چەند كەسێک لە دانیشتوانی فەلوجە بەلێدان و سوكایەتی پێكردن دەستدرێژییان كردەسەر كوردێک، كە لەشارەكەدا خواردنگەی داناوە و داوایان لێكردبوو خواردنگەكەی دابخات، دواتریش لەلایەن هێزە ئەمنیەكانی فەلوجەوە دەستدرێژیكاران دەستگیركران و خواردنگەكەشیان بۆ گەنجە كوردەكە كردەوە.
