2019-08-18 1100
كه‌بابخانه‌یه‌ك له شارى سلێمانى له‌لایه‌ن لیژنه هاوبه‌شه‌كانى قائیمقامیه‌ته‌وه داده‌خرێت و خاوه‌نه‌كه‌شى رووبه‌ڕووى رێكاری یاسایی ده‌كرێته‌وه.
ئاوێنه: ئه‌مڕۆ یه‌ك شه‌ممه بێوه‌ی ئه‌حمه‌د, نوێنه‌ری به‌ڕێوه‌به‌رایه‌تی ڤێته‌رنه‌ری سلێمانی له لیژنه‌كانی قائیمقامیه‌ت رایگه‌یاند "له‌لایه‌ن لیژنه‌ی دووی سه‌ر به لیژنه هاوبه‌شه‌كانی قائیمقامیه‌ت و به‌هۆی پابه‌ندنه‌بوونی به مه‌رج و رێنماییه‌كانی كاركردن به‌تایبه‌ت ته‌ندروستی و ڤێته‌رنه‌ری، كه‌باب و برژاوی میران داده‌خرێت".
ئه‌وه‌شى خسته‌ڕوو "خاوه‌نی كه‌باب و برژاوی میران بۆ چه‌ندین جار باڵی مریشكی خاوكردۆته‌وه و جارێكی دیكه له به‌فرگر عه‌مباری كردووه‌ته‌وه، به‌مه‌ش به‌های خۆراكی له‌ده‌ست ده‌دات و زیان به ته‌ندروستی ئه‌و كه‌سانه ده‌گه‌یه‌نێت كه ئه‌و جۆره خوارده‌مه‌نییه ده‌خۆن".
باسى له‌وه‌شكرد "كه‌باب و برژاوی میران ئه‌و شیشه‌ی بۆ برژاندن به‌كاریهێناوه ره‌ش و ژنگكردوو بووه، رێنماییه‌كانی ته‌ندروستی ئاماژه بۆ ئه‌وه ده‌كه‌ن ژه‌نگ له له‌شی مرۆڤدا ده‌نیشێت و سیستمی به‌رگری له‌ش تێكده‌دات، بۆیه پێویسته به وریاییه‌كه‌ی زۆره‌وه مامه‌ڵه له‌گه‌ڵ ئه‌و كانزایانه بكرێت كه بۆ خوارده‌مه‌نی به‌كارده‌هێندرێت".
ئاماژه‌ى به‌وه‌شكرد "نهۆمی ژێرزه‌مینی كه‌باب و برژاوی میران وه‌ك كۆگای عه‌مباركردنی خوارده‌مه‌نی به‌كارهێنراوه كه هیچ مه‌رجێكی ته‌ندروستی تێدا نییه، بۆیه به بڕیاری قائیمقامی سلێمانی شوێنه‌كه‌ی داده‌خرێت و خاوه‌نه‌كه‌شی رووبه‌ڕووی رێكاری یاسایی ده‌كرێته‌وه".