ئیبراهیم عەلیزادە، سكرتێری كۆمەڵە – رێكخراوی كوردستانی حزبی كۆمۆنیستی ئێران رایدەگەیەنێت ئێران ناتوانێت وەڵامی سەربازی ئیسرائیل بداتەوە، دەشڵێت "ئێراخ خەریكە ئاخرین تەكبیری خۆی دەكات بۆ سازانی لەگەڵ ئەمریكا".
ئاوێنە: شەوی رابردو سوپای ئیسرائیل ئامانجەكانی فەیلەقی قودسی ئێرانی لە سوریا كردە ئامانج‌و زیانێكی گەورەی پێگەیاندوە، و بنیامین ناتانیاهۆ، سەرۆك وەزیرانی ئیسرائیلیش رایدەگەیەنێت هێرشەكانیان بۆسەر ئێران بەردەوام دەبێت، لەبارەی هێرشی ئیسرائیل بۆسەر ئامانج‌و دامەزراوە سەربازییەكانی ئێران لە سوریا، ئیبراهیم عەلیزادە رایدەگەیەنێت لەئێستادا ئێران توانای وەڵامدانەوەی سەربازیی نیە لەدژی ئیسرائیل.
عەلیزادە رایدەگەیەنێت لە ئێستادا ئێران لەهەوڵی ئەوەدان بە شێوەیەكی ژێر بەژێر بیر لە رێگایەك بكەنەوە بۆ گفتوگۆكردن‌و سازانیان لەگەڵ ویلایەتەیەكگرتوەكانی ئەمریكا، پێشی وایە ئێران بەراورد بەهەمو ئەو هێرشانەی پێشتر ئیسرائیل لەدژی ئەنجامی داوە بابەتەكەی زیاد لەقەبارەی خۆی گەورە كردوە، ئەو وتی "ئەو هەڵایەی ئێران لەسەر هێرشەكەی شەوی رابردو دەستی داوەتێ پەیوەندی بەو كۆنفرانسەی وارشۆوە هەیە كە وابریارە مانگی داهاتو ببەسترێت".