ئەحمەدی حاجی
رەشید، پەرلەمانتاری كۆمەڵی ئیسلامی لەپەرلەمانی عێراق دەڵێت؛ ئەگەر هەرێمی
كوردستان لەو ماوە كەمەی كە لەبەردەستیدایە، رێككەوتنی نوێ لەگەڵ بەغدا ئەنجام
نەدات ئەوا یاسای بودجەی گشتی عێراق بۆ ساڵی داهاتو، كۆمەڵێك دەقی تێدا
جێدەكرێتەوە كە بە خوستی هەرێم نابن.
ئاوێنە: ئەحمەدی
حاجی رەشید، ئەندامی لیژنەی دارایی لەپەرلەمانی عێراق لەنوسینێكدا لەلاپەڕەی خۆی
لە فەیسبوك رایگەیاند كە هەرێمی كوردستان كاتی كەمی لەبەردەستە بۆ گەیشتن بە
رێككەوتن لەگەڵ بەغدا سەبارەت بە پرسی بودجەو نەوت.
ئەحمەدی حاجی
رەشید رونیكردۆتەوە كە بەپێی یاسای ئیدارەی دارایی، دەبێت وەزارەتی
دارایی حکومەتی ئیتیحادی پرۆژە یاسای بودجە لەناوەڕاستی مانگی (۹) ئامادەبکات و لەئەنجومەنی
وەزیران دەنگی لەسەر بدرێت و لە کۆتایی مانگی (۱٠) بگاتە پەرلەمان
و لە سەرەتای ساڵی داهاتو واتە ۲٠۲٠ دەنگی لەسەر
درابێت.
وتوشیەتی"هەربۆیە دەبێت هەرێم رێکكەوتنی نوێ بەئەنجام بگەیەنێت و بابەتەکانی
نەوت و گومرگ و باجەکان یەکلابکاتەوە ئەگەر نا یاسای بودجە بەبێ بەشداری هەرێم کۆمەڵێك
تێکستی تێدا دادەنرێت کە بەخواستی هەرێم نابێت."
ئەوەش لەكاتێكدایە كە ئێوارەی ئەمڕۆ وتەبێژی حكومەتی هەرێمی كوردستان لە
كۆنگرەیەكی رۆژنامەوانیدا رایگەیاند، چارەسەركردنی كێشەكان لەگەڵ بەغدا پێویستی بە
كاتی زیاترە.