سەركردەیەكی عەسائیبی ئەهلی هەق، سەربە حەشدی شەعبی، بانگەشەی ئەوە دەكات
كە باڵیۆزخانەی ئیسرائیل لەنێو باڵیۆزخانەی ئەمریكا لەبەغدا بونی هەیەو بەشێكی
ئەمنی و هەواڵگریی هەیە كە بەرپرسیارە لەوەشاندنی گورز لەپێگە ئەمنییەكانی عێراق
بەتایبەت كۆگاكانی چەك و تەقەمەنی حەشدی شەعبی.
ئاوێنە: حەسەن سالم، كە هاوكات پەرلەمانتاری كوتلەی سادقون-ی سەربە
عەسائیبی ئەهلی هەقە لەپەرلەمانی عێراق، ئەمڕۆ پێنجشەممە لە ژمارەیەك تویتدا
رایگەیاند؛ لەنێو باڵیۆزخانەی ئەمریكا لە بەغدا باڵیۆزخانەی ئیسرائیل بونی هەیە كە
خاوەنی بەشێكی ئەمنی-هەواڵگریی-سیخوڕییەو هەڵدەستێت بە ئەنجامدانی چەندین ئەرك
لەوانە ئەنجامدانی كوشتن و تەقینەوەو دوایین ئەركیشی كە پێی هەڵساوە وەشاندنی گورز
بوە لە بنكەو پێگەی هێزە ئەمنییە عێراقییەكان بە تایبەت كۆگای چەك و
تەقەمەنییەكانی حەشدی شەعبی.
وتوشیەتی"هیچ ئاسایش و سەقامگیرییەك لەعێراق بونی نابێت تا ئەو
باڵیۆزخانەیە كە لە دو باڵیۆزخانە پێكهاتوە نەك یەك دانە دانەخرێت كە باڵیۆزخانەی
قەوارەی زایۆنی لەخۆدەگرێت."
حەسەن سالم بەپێویستیشی زانیوە ئەو پرسە بكرێتە پرسێكی نێودەوڵەتی و
بێدەنگی بەرامبەر بەو "تاوانانە" هەڵنەبژێردرێت.
باسی لەوەش كردوە كە دژایەتی ئەمریكا بۆ ئەو بە ئامانجگرتنە راست نییە
چونكە "ئەمریكا واتە قەوارەی زایۆنی و قەوارەی زایۆنیش واتە ئەمریكا كە ئەوە
كۆنترۆڵی ئاسمانی عێراقی كردوەو بۆیە دەبێت كۆتایی بە هاوپەیمانی لەگەڵ ئەمریكا
بهێنرێت كە هۆكاری سەرەكی بەزاندنی ئاسمانی عێراقە."