عەبدولمەهدی فەرماندەیی ئۆپەراسیۆنەكانی ئەنبار بەسەرکردووە
  2019-08-25       239       
عادل عەبدولمەهدی، سەرۆكوەزیرانی عێراق بە مەبەستی ئاگاداربوون لە بەڕێوەچوونی ئۆپەراسیۆنەكان دژبە پاشماوەكانی داعش، گەیشتە بارەگای فەرماندەیی ئۆپەراسیۆنەكانی ئەنبار.

ئاوێنه‌: نوسینگەی سەرۆكوەزیرانی عێراق راگەیەندراوێكی بڵاوكردەوە و تیایدا ئاماژەی بەوەكردووە كە عادل عەبدولمەهدی، سەرۆكوەزیران و فەرماندەی گشتی هێزە چەكدارەكان بۆ ئاگاداربوون لە چۆنیەتی بەڕێوەچوونی ئۆپەراسیۆنەكان كە بە ئامانجی راوەدوونانی پاشماوەكانی داعش ئەنجام دەدرێن گەیشتووەتە بارەگای فەرماندەیی ئۆپەراسیۆنەكانی ئەنبار.

لای خۆیەوە نەقیب ئەحمەد دلێمی، ئەفسەر لە پۆلیسی ئەنبار لە لێدوانێكدا ئاشكرایكرد كە سەرۆكوەزیران، عادل عەبدولمەهدی بە یاوەری هەریەك لە نەجاح شەممەری، وەزیری بەرگریی و یاسین یاسری، وەزیری ناوخۆ و فەریقی یەكەم عوسمان غانمی، سەرۆک ئەركانی سوپا گەیشتووەتە بارەگای فەرماندەیی ئۆپەراسیۆنەكانی ئەنبار.

دوێنی هێزەكانی سوپا و پۆلیس، قۆناغی چوارەمی ئۆپەراسیۆنی ''ئیرادەی نەسر'' بە ئامانجی پاكسازیكردنی ناوچەكانی باشووری رووباری فورات و دۆڵی حۆڕان رۆژئاوای ئەنبار لە پاشماوەكانی داعش دەستپێكرد.

بەپێی راگەیەندراوێكی حەشدی شەعبی لە میانی یەكەم رۆژی قۆناغی چوارەمی ئۆپەراسیۆنی ''ئیرادەی نەسر''دا، ژمارەیەك گوند لە رۆژئاوای ئەنبار لە پاشماوەكانی داعش لە لایەن هێزە عێراقییەكانەوە پاكسازیكراون، هەروەها سێ تیرۆریستیش كوژراون.

ئەمڕۆ یەكشەممە، هێزە عێراقییەكان درێژە دەدەن بە دووەم رۆژی ئۆپەراسیۆنی قۆناغی چوارەمی ئۆپەراسیۆنی ''ئیرادەی نەسر'' لە رۆژئاوای ئەنبار.
زۆرترین بینراو
© 2018 Awene Online, Inc. All Rights Reserved.
×