هەپەگە ئاشکرای کرد؛ بانگەشەی تورکیا سەبارەت بەوەرگەڕانی زرێپۆشێکی پۆلیس لە
ئامەدو گیان لەدەستدانی دو پۆلیس ناڕاستە، بەڵکو لە چالاکی گەریلادا
زرێپۆشەکە لێیدراوە و لەئاکامدا حەوت پۆلیسی سەر بە هێزی تایبەت کوژران. هاوکات لە
جۆلەمێرگیش دو پۆلیس و "کۆنترایەک(دژە گەریلا)" کوژراون.
ئاوێنە: ناوەندی راگەیاندنی هێزەکانی پاراستنی گەل(هەپەگە)، ئەمڕۆ یەكشەممە،
لەبەیاننامەیەكدا رایگەیاند، دوێنێ ۲٤ی ئاب لەنێوان ناوچەی
شەمزینان و ناوچەی گەڤەری جۆلەمێرگدا، ژنە گەریلاکانی یەکینەکانی ژنی ئازاد (یەژاستار) چالاکییەكیان دژبە سوپای تورکیا ئەنجام داوەو لە ئاکامدا،
دو پۆلیسی سەر بە هێزەکانی جموجوڵی تایبەت و یەك "کۆنترا"ی
بەکرێگیراو کوژران.
بەپێی بەیاننامەكە
هەمان رۆژ لە ناوچەی پیرانی ئامەد، گەریلا چالاكییەكیان دژبە سەربازگەیەك
ئەنجام داوە و لە ئاکامیدا زرێپۆشێک، خاڵەکانی ئێشكگری و پاسەوانی و سەنگەرەکانی سەربازگەکە
کراونەتە ئامانج و بە هۆیەشەوە زرێپۆشەکەو چەندین خاڵ و سەنگەری دوژمن تێکشکێنراون
و خاپور کراون.
وتوشیەتی"رژێمی تورکیا سەبارەت بەو چالاکییەمان بانگەشەی کردبو، گوایە
زرێپۆشێکی پۆلیس وەرگەڕاوە و گیان لەدەستدانی دو پۆلیسی لێکەوتوەتەوە،
بەڵام ئەوە ڕاست نییە، بەڵکو لە چالاکی گەریلاکانماندا سەربازگە و زرێپۆشەکە کراونەتە
ئامانج و لەئاکامدا حەوت پۆلیسی سەر بە هێزی جموجوڵی تایبەت کوژران."