2019-08-28   1769     
وەزارەتی بازرگانی و پیشەسازی عیراق لەپێناو برەودان بە بەرهەمی ناوخۆیی، بڕیاریداوە جگەرەی سۆمەر لەگەڵ بەشە خۆراكی مانگانە، بەسەر هاووڵاتیان دابەشبكات، بەرپرسێكی هەرێمیش لەوبارەیەوە زانیاری نوێ ئاشكرا دەكات.
ئاوێنه: مەحەمەد حەنون، وتەبێژی وەزارەتی بازرگانی عیراق رایگەیاند ''بەمەبەستی پاڵپشتیكردن لەبەرهەمی نیشتمانی، جگەرەی سۆمەر لەگەڵ بەشە خۆراكی مانگانەی هاووڵاتیان بەنرخێكی گونجاو دابەشدەكرێت''.
یاسین مەحمود، بەڕێوەبەری پسوڵەی خۆراك لەسلێمانی ئاشكرایكرد، تا ئێستا هیچ شتێكمان لەبارەی ئەو بڕیارەوە پێنەگەیشتووە، بەڵام بەدڵنیاییەوە هەرێمی كوردستان ناگرێتەوەو رەنگە تەنها لەپارێزگاكانی ناوەڕاست و خوارووی عیراق جگەرە، لەگەڵ بەشە خۆراك دابەشبكرێت.
باسی لەوەشكرد، هەركاتێك بڕیاری دابەشكردنی جگەرە یاخود نوسراوی لەو جۆرەمان بەدەست گەیشت، قسەی خۆمان دەبێت.
لەلایەكیترەوە عەبدولڕەزاق ناوەندی بەڕێوەبەری گشتی دیوانی وەزارەتی بازرگانی هەرێم، لەلێدوانێكدا رەتیكردەوە، هیچ نوسراوێكی فەرمیان لەلایەن بەغداوە بەمەبەستی دابەشكردنی جگەرە، لەگەڵ بەشەخۆراكی مانگانە بەدەست گەیشتبێت.