وەزارەتی دەرەوەی ئێران تۆمەتباركردنی وڵاتەكەی لەلایەن ئەمریكاوە بە ئەنجامدانی هێرشەكانی سەر دو دامەزراوە نەوتییەكەی سعودیە رەتدەكاتەوە كە بوە هۆی پەكخستنی بەشێك لە بەرهەمی نەوتی جیهان.
ئاوێنە: پێشتر هێزە چەكدارەكانی حوسییەكانی یەمەن كە هاوپەیمانی ئێرانن بەرپرسیارێتی خۆیان لە هێرشەكەی دوێنێ شەممە بۆ سەر دو دامەزراوەی نەوتی سعودیە راگەیاند كە بونە هۆی پەكخستنی زیاتر لە نیوەی بەرهەمی نەوتی سعویە.
بەڵام مایك پۆمپیۆ، وەزیری دەرەوەی ئەمریكا رایگەیاند، هیچ بەڵگەیەك نییە كە ھێرشانە لە یەمەنەوە ئەنجام درابن و ئێرانی تۆمەتباركرد بەوەی "هێرشێكی بێ پێشینەی كردۆتە سەر بەرهەمی وزەی جیهانی."
ئەمڕۆش یەكەشممە، عەباس موسەوی، وتەبێژی وەزارەتی دەرەوەی ئێران لە لێدوانێكدا بۆ تەلەفزیۆنی رەسمی وڵاتەی ئەو تۆمەتانەی ئەمریكا بە "تۆمەتی بەتاڵ" ناوبرد.
لەلایەكی دیكەوە ئاژانسی تەسنیم-ی ئێرانی، لەزاری ئەمیر عەلی حاجی زادەوە، فەرماندەی هێزە ئاسمانییەكانی سوپای پاسدارانەوە بڵاویكردەوە"با هەموان بزانن كە سەرجەم ئەو بنكە ئەمریكیانەو كەشتییە فڕۆكە هەڵگرەكانیان كە یەك هەزار كیلۆمەتر لە ئێرانەوە دورن لەنێو ئامانجی موشەكەكانماندان."
هێرشەكان بەرەبەیانی دوێنێ شەممە دو دامەزراوەی نەوتی سەر بە كۆمپانیای نەوتی نیشتمانی سعودیەیان لە رۆژهەڵاتی ئەو وڵاتە كردە ئامانج.