پێنج گوندی سەر بە ناحیەیەكی دیالە دەكەونە دەست داعش
  2019-01-23       398       
ناحیەی ئەبی سەید لە سنوری پارێزگای دیالە

بەڕێوەبەری یەكێك لە ناحیەكانی سەر بە پارێزگای دیالە رایگەیاند بەشێكی زۆری گوندەكانی باشوری ناحیەكەیان كەوتونەتە ژێر دەستی چەكدارانی داعش و جەختیش دەكاتەوە كە لەو ناوچانە رۆژانە ھێزە ئەمنییەكان دەكرێنە ئامانج.

ئاوێنە: حارس روبەیعی، بەڕێوەبەری ناحیەی "ئەبی سەیدا"، ئەمڕۆ(چوارشەممە)، لەبەیاننامەیەكدا ئاشكرایكرد"راستییەكی تاڵ هەیە كە دەبێت رای گشتی عێراق و حكومەتی ناوەندو سەرجەم سەركردەكان بیزانن كە ئەویش ئەوەیە پێنج ناوچە كە پێكدێن لە گوندەكانی (مەخیسە، ئەبوكەرمە، شێخی، چەلەبی، ئەبوخەنازیر) لەسنوری ناحیەی ئەبی سەید، لەژێر دەستی داعشدان لەڕوی سەربازییەوە."

بەپێی قسەی حارس روبەیعی ئەو ناوچانە بونەتە پەناگەیەك بۆ چەكدارانی داعش و هیچ دەسەڵاتێكی هێزە ئەمنییەكان لەو ناوچانە بونی نییە.

هێمای بۆ ئەوەش كردوە كە رۆژانە هێزە ئەمنییەكان لەو ناوچانە دەكرێنە ئامانج بەتایبەت لەشەوداو بەچەكی قەناس كە ئەوەش بۆتە هۆی كوژران و برینداربونی ژمارەیەكی زۆر لە هێزە ئەمنییەكان.

جەختیشی كردۆتەوە كە دزی و تاڵانییەكان لە پارێزگای دیالە، پشتیوانی دارایی سەرەكین بۆ سەرجەم كردەوە تیرۆریستییەكان لەسەرتاسەری پارێزگاكەدا.

زۆرترین بینراو
© 2018 Awene Online, Inc. All Rights Reserved.
×