یەكێتی نیشتمانی
كوردستان و كۆمەڵی ئیسلامی جەخت لەسەر گرنگی یەکخستنی لایەنە کوردستانییەکان و هەوڵدان
بۆ دروستکردنی یەکلیستی لایەنە کوردستانییەکان لەم قۆناغەدا لە ناوچە جێناكۆكەكان دەكەنەوە.
ئاوێنە: بەپێی
راگەیەندراوێكی ئەنجومەنی سیاسی كۆمەڵی ئیسلامی، پاشنیوەڕۆی ئەمڕۆ دوشەممە، لەبارەگای
ئەنجومەنی سیاسی كۆمەڵ لەشاری سلێمانی محەمەد حەکیم، کارگێڕی ئەنجومەنی سیاسی و جیهانگیر
ئەحمەد کارگێڕی ناوەندی هەڵبژاردنی کۆمەڵی ئیسلامی پێشوازیانکرد لە ڕزگار عەلی، ئەندامی
مەکتەبی سیاسی و بەرپرسی دەزگای هەڵبژاردنی یەكێتی و ئیکرام عەلی بەرپرسی پەیوەندییە
کوردستانیەکانی یەکێتی نیشتمانی کوردستان.
بەگوێرەی راگەیەندراوەكە
لەدیدارەکەدا باس لە یاسای هەڵبژاردنی ئەنجومەنی پارێزگاکانی عێراق و بەشداری کورد
لەو هەڵبژاردنانە بەتایبەت لەپارێزگاکانی کەرکوک و موسڵ و سەڵاحەدین و دیالە و
گرفت و لەمپەرەکانی ئەم هەڵبژاردنە بەتایبەت هەندێ بڕگەو ماددەی خراپی یاسای هەڵبژاردنی
پارێزگاکان کرا.
لەبەشێکی دیکەی
کۆبونەوەکە جەخت لەسەر گرنگی یەکخستنی لایەنە کوردستانیەکان و هەوڵدان بۆ
دروستکردنی یەکلیستی لایەنە کوردستانیەکان لەم قۆناغەدا بە خاڵێکی ئەرێنی لەقەڵەم
درا.