2019-09-17   831     
بە فەرمی ئەمڕۆ فرسەت سۆفی وەک پارێزگاری نوێی هەولێر دەستی بە کارەکانی کرد.
ئاوێنه: ئەمڕۆ لە رێوڕەسمێکدا بە ئامادەبوونی رێبەر ئەحمەد، وەزیری ناوخۆی حکوومەتی هەرێمی کوردستانی عێراق و نەوزاد هادی، پارێزگاری پێشووی هەولێر و فرسەت سۆفی، پارێزگاری نوێی هەولێر، ئاڵوگۆڕی پۆستی پارێزگاری هەولێر ئەنجام درا.
هاوکات وەزیری ناوخۆ رێبەر ئەحمەد پیرۆزبایی لە فرسەت سۆفی کرد و ئاماژەی بەوە کرد کەوا پارێزگاری نوێی هەولێر دەتوانێت لە ئێش و ئازاری خەڵک تێبگات.
دواتر نەوزاد هادی پشتگیری تەواوی خۆی بۆ فرسەت سۆفی راگەیاند و جەختی لەوە کردەوە لە هەموو یەکە ئیدارییەکانیش پاڵپشتی بکەن.
فرسەت سۆفی لای خۆشیەوە دووپاتیکردەوە کە خزمەتی خەڵکی هەولێر بکات و وتی، ''شەو و رۆژ دەخەینە سەر یەک تاکو بتوانین خزمەتی زیاتری خەڵکی ئەم شارە بکەین و داواش دەکەم هەموومان بە یەک تیم کارەکان بکەین چونکە کەسمان بە تەنها هیچ نین''.