2019-09-21 1073
پەرلەمانتارێکی یەکێتی نیشتیمانی کوردستان لە ئەنجوومەنی نوێنەرانی عێراق رادەگەیەنێت ''بەپێی کوالیس و کۆبوونەوەکانی ئەم دواییانە هەرێم داوای ٢٤ ملیار دۆلار لە حکوومەتی ناوەند دەکات لەبەرامبەر رازیبوون بە ناردنی ٢٥٠ هەزار بەرمیل نەوت''.
ئاوێنه: لەمیانی لێدوانێکی رۆژنامەوانیدا حەسەن ئاڵی، پەرلەمانتاری یەکێتی نیشتیمان کوردستان لە ئەنجوومەنی نوێنەرانی عێراق ئاماژەی بەوەدا کە حکوومەتی هەرێمی کوردستان لەبەرامبەر وەرگرتنی ٢٤ ملیار دۆلار ئامادەیی خۆی نیشانداوە بە رادەستکردنی ٢٥٠ هەزار بەرمیل نەوت رۆژانە بە کۆمپانیای سۆمۆی عێراقی تایبەت بە بازرگانیکردنی نەوت.
هاوکات حه‌سه‌ن ئاڵی دەڵێت، ''حکوومەتی کوردستان ٢٤ ملیار دۆلار قەرزاری کۆمپانیاکانی نەوتە بەهۆی بڕینی بەشە بودجەی ساڵانی ٢٠١٤، ٢٠١٥، ٢٠١٦، و ٢٠١٧ لەلایەن حکوومەتەکانی مالیکی و عەبادی''.
ئەو پەرلەمانتارە راشیگەیاند ''پێویستە حکوومەتی ناوەند ئەم بڕە پارەیە بدات بە حکوومەتی هەرێم چونکە سەرجەم ئەو قەرزانە بۆ پێدانی مووچەی فەرمانبەران وەرگیراوە''.
لەلایەکی دیکەوە ئەو پەرلەمانتارە دەڵێت، ''بەرەوپێشڤەچوونێکی گەورە هەیە لە دانوستاندنەکان. حکوومەتی ناوەند شاندێک پێکدەهێنێت و سەردانی هەولێر دەکات بە سەرۆکایەتی فالح فەیاز و محەمەد هاشمی، بەرپرسی نووسینگەی سەرۆکوەزیران عادل عەبدولمەهدی. چاوەڕێ دەکرێت لە ماوەکانی داهاتوو بڕە پارەکە بە چەند جارێک رەوانەی هەرێم بکرێت و رۆژانە ٢٥٠ هەزار بەرمیل نەوتیش رادەستی سۆمۆ بکرێت''.