عەلی حەمەساڵح، سەرۆكی فراكسیۆنی گۆڕان لەپەرلەمانی كوردستان ئەو پڕۆژانە ئاشكرادەكات كە بڕیارە لەم وەرزەی پەرلەماندا كاریان لەسەر بكرێت و دەشڵێت؛ تا ئێستا گەندەڵی گەورە لە دۆسیەی نەوتدا هەیەو پێویستە چاكسازی تێدا بكرێت.

ئاوێنە: عەلی حەمەساڵح، ئەمڕۆ یەكشەممە، لەڕاگەیەندراوێكدا باسی لەو پڕۆژانە كردوە كە لەم وەرزەی پەرلەماندا كاریان لەسەر دەكرێت و وتویەتی"له‌ ڕۆژانی ئاینده‌دا پرۆژه‌ یاسای چاکسازی له‌ موچه‌و خانه‌نشینی و یه‌که‌ی ژمێریارییه‌کان دێته‌ په‌رله‌مان."

ئەوەشی خستۆتەڕو"لێکۆڵینه‌وه‌و به‌دواداچونێکی وردمان له‌سه‌ر گه‌نده‌ڵی له‌ خاڵه‌ سنورییه‌کان کردوه‌و خستومانه‌ته‌ به‌رده‌ست لایه‌نی په‌یوه‌ندیدار، ئێستا وه‌زاره‌تی دارایی و ئه‌نجومه‌نی وه‌زیران سه‌رقاڵی لێکۆڵینه‌وه‌و ئاماده‌کردنی پرۆژه‌ن بۆ پێداچونه‌وه‌ به‌ سیستمی باج و گومرگدا."

ئاشكراشیكردوە"بڕیاری هه‌مواری یاسای وه‌به‌رهێنانیش هه‌یه‌، که‌ هۆکاری گه‌نده‌ڵی گه‌وره ‌بوه‌ له‌ کوردستان و چه‌ندین که‌سی به‌ناڕه‌وا کرده‌ ملیۆنێر."

هەروەك باسی لەوەش كردوە كە پرۆژه‌یه‌ک هەیە بۆ دروستکردنی دامه‌زراوه‌یه‌کی ده‌رمان بۆ ڕێگری له‌ بازرگانی ناشه‌رعی و ده‌رمانی قاچاخ، لەگەڵ بونی چه‌ندین پرۆژه‌ی دیکه‌.

سەرۆكی فراكسیۆنی گۆڕان بونی ئەو پڕۆژانەی بە "هەنگاوی باش" ناوبردن و وتوشیەتی"جێگای ده‌ستخۆشی و پشتیوانین."

بەڵام لەگەڵ ئەوەش وتویەتی"تائێستا گرفت و گه‌نده‌ڵی گه‌وره‌ له‌ دۆسیه‌ی نه‌وتدا هه‌یه‌و پێویسته‌ به‌جدی چاکسازی له‌م دۆسیەیە‌شدا بکرێت."

عەلی حەمەساڵج لەكۆتاییدا جەختی كردۆتەوە كە ئەوە باوەڕی تەواویانە كە هەر هەنگاوێك بۆ چاكسازی هەبێت، پشتیوانی بكەن و وتوشیەتی"له‌ کوێ گه‌نده‌ڵی و که‌موکورتی هه‌بێت قسه‌ی جدی له‌سه‌ر ده‌که‌ین."