عادل عەبدولمەهدی، سەرۆك وەزیرانی عێراق، نیوەشەوی رابردو، بڕیاریدا بە
قەدەغەكردنی هاتوچۆ لە بەغدا لە سەعات 5ی سەرلەبەیانی ئەمڕۆ(پێنجشەممە)وە تا
كاتێكی نادیار.
ئاوێنە: بڕیارەكەی سەرۆك وەزیرانی عێراق، دوای دو رۆژ لە بەردەوامی خۆپیشاندانەكان
لە بەغداو چەند پارێزگایەكی دیكەی خواروی عێراق دێت كە توندی تیژی لێكەوتەوەو
بەهۆیەوە تا ئێستا حەوت كەس كوژراون و چەندانی دیكە بریندار بون.
عادل
عەبدولمەهدی، لەبەیاننامەیەكدا رایگەیاند، بڕیاری قەدەغەكردنی هاتوچۆ لەسەر بنەمای
ئەو بەیاننامەی كۆبونەوەی سەركردە سیاسییەكان بوە كە شەوی رابردو لە كۆشكی سەلام
بەڕێوەچو و لەپێناو پارێزگاریكردنە لە سیستمی گشتی و ئاسایشی ناوخۆ و پاراستنی خۆپیشاندەران
لە هەندێك دەست كە هێرشیان كردۆتە سەر هێزە ئەمنییەكان و موڵكی گشتی و تایبەت.
هێمای بۆ ئەوەش كردوە كە هێزە ئەمنییەكان
رێگە بە هاتوچۆی هاوڵاتیان بە یاساو ئەو گەشتیارانە لە فڕۆكەخانەی بەغداوە دێن یان
بۆ فڕۆكەخانە دەچن و هەروەها ئۆتۆمبێلەكانی فریاكەوتن و حاڵەتی نەخۆشی كە پێویستی
بە چارەسەرە و ئەو كارمەندانەشی كە لە نەخۆشخانەكان و فەرمانگەكانی كارەبا و
فەرمانگەكانی ئاون.
سەرۆك وەزیرانی عێراق هێمای بۆ ئەوەش كردوە
كە پارێزگارەكان خۆیان سەرپشكن لە بڕیاردان لە قەدەغەی هاتوچۆ لە پارێزگاكانیاندا.
ئەوەش لەكاتێكدایە كە ئێوارەی دوێنێ بههۆی ئهو خۆپیشاندانانهی بهغدا و چهند پارێزگایەكی دیكهی عێراقی گرتوهتهوه، وەزیری بهرگری عێراق به فهرمانێك سهرجهم كهرته سهربازییهكانی خستە ئامادهباشییهوه و داوشی لێ كردن دان بهخۆیاندا بگرن.