عەلی سیستانی،
مەرجەعی باڵای شیعەكان لەعێراق پشتیوانی خۆی بۆ داواكاریی خۆپیشاندەران راگەیاندو
داواش لە خۆپیشاندەران و هێزە ئەمنییەكان دەكات خۆیان بەدور بگرن لە بەكارهێنانی
توندوتیژی و سەركردەو بەرپرسە عێراقییەكانیش بەتایبەت پەرلەمانتاران تۆمەتبار
دەكات بەوەی "شكست"یان هێناوە لەدژایەتی گەندەڵیدا.
ئاوێنە: ئەو
وتانەی عەلی سیستانی، مەرجەعی باڵای شیعەكان لەمیانی وتاری هەینیدا هات كە لەلایەن
ئەحمەد سافی، نوێنەری مەرجەعیەتەوە لە نوێژی هەینیدا لە كەربەلا خوێنرایەوە.
لە وتارەكەدا
هاتوە"هێشتا حكومەت و لایەنە سیاسییەكان وەڵامیان بۆ داواكارییەكان گەل
سەبارەت بە دژایەتی گەندەڵی یاخود بەدیهێنانی شتێك لەسەر ئەرزی واقیع نەبوە."
هەروەك وتیشی"پێویستە حكومەت ئاڕاستەی
خۆی لە مامەڵەكردن لەگەڵ كێشەكان وڵات بگۆڕێت...و چارەسەری دۆخەكان بكات بەرلەوەی
كار لەكار بترازێت."
هەروەك لە وتارەكەیدا عەلی سیستانی
نیگەرانی خۆی بەرامبەر بە قوربانییەكان دەربڕی و وتیشی"دەستدرێژیی بۆ سەر
خۆپیشاندەرانی ئاشتیخواز و هێزە ئەمنییەكان رەتكراوەو ئیدانەكراوە."
لەبەشێكی دیكەی وتارەكەیدا داوای لە حكومەت
كرد بە ئەركی خۆی هەڵبسێت بۆ كەمكردنەوەی كێشەكانی هاوڵاتیان و لە دۆسییەی دامەزراندندا
خۆی بەدور بگرێت لە "مەحسوبیەت."
جەختیشی كردەوە كە پێشتر لایەنە حكومییەكان
گوێیان لە پێشنیارەكانی مەرجەعیەت نەگرتوە كە داوای لێكردون ئاڕاستەی خۆیان بگۆڕن
و دەست بە دژایەتی گەندەڵی بكەن.
بەپێی قسەی مەرجەعی باڵای شیعەكان دەسەڵاتی
دادوەریی و دەزگاكانی چاودێری بەرپرسیارێتی گەورەیان لە شوێنپێهەڵگرتنی گەندەڵی
دەكەوێتە ئەستۆ بەڵام بە ئەركی خۆیان هەڵنەساون.
هەروەك وتیشی؛ پەرلەمانی عێراق بەرپرسیارێتییەكی
گەورەتری لە پرسی چاكسازیدا دەكەوێتە ئەستۆ.
ئەمڕۆ هەینی، خۆپیشاندانەكانی عێراق بۆ
رۆژی چوارەمی لەسەریەك بەردەوام بون و ئاژانسی رۆیتەرز لە زاری چەند سەرچاوەیەكی
پزیشكی و ئەمنییەوە بڵاویكردۆتەوە كە ژمارەی كوژراوانی خۆپیشاندانەكان بۆ 44 كەس
بەرزبۆتەوە.