ئاژانسێكی روسی: توركیا دەستی بە ئۆپەراسیۆن بۆ سەر باكوری رۆژهەڵاتی سوریا كرد
  2019-10-07       1309       

بەپێی ئاژانسێكی روسی، سوپای توركیا دەستی كردوە بە ئۆپەراسیۆن بۆ سەر باكوری سوریاو فڕۆكە جەنگییەكانی ئەو وڵاتە بۆردومانی پێگەیەكی یەكینەكانی پاراستنی گەل(هەپەگە)یان لە سنوری پارێزگای حەسەكە كردوە.

ئاوێنە: ئاژانسی سپوتنیكی روسی بڵاویكردۆتەوە كە فڕۆكە جەنگییەكانی توركیا، بارەگایەكی یەكینەكانی پاراستنی گەلیان لە "تەل تەویل" لەدەوروبەری شارۆچكەی "دێرك"ی سەربە پارێزگای حەسەكە لە باكوری رۆژهەڵاتی سوریا بۆردومان كردوە.

هەروەك هێمای بۆ ئەوەش كردوە كە فڕۆكە جەنگییەكانی سوپای توركیا، بۆردومانی گوندی "خانیكا"یان لەنزیك دەروازەی سمێلكا كردوە.

ئاژانسەكە لەزاری چەند سەرچاوەیەكی ناوخۆیی سوریاوە بڵاویكردۆتەوە كاروانێكی ئۆتۆمبێل و زرێپۆشی سوپای توركیا لە جەرابلوس-ەوە بەرەو دەوروبەری شارۆچكەی منبج جوڵاوە كە ئەوەش هاوكاتە لەگەڵ ئامادەكردنی میلیشیاكانی سوپای توركیا بۆ جوڵە.

زۆرترین بینراو
© 2018 Awene Online, Inc. All Rights Reserved.
×