2019-10-09 784
به‌رپرسانی کورد و ئه‌مریکا به گۆڤاری فۆرن پۆلسی ئه‌مریکایان راگه‌یاندوه ''ئه‌مڕۆ هێرشه چاوه‌ڕوانکراوه‌که‌ی تورکیا بۆ سه‌ر ڕۆژهه‌ڵاتی فورات ده‌ست پێده‌کات''.
ئاوێنه: به‌رپرسانی کورد و ئه‌مریکا به گۆڤاری فۆرن پۆلسییان ڕاگه‌یاند ''پێده‌چێت هێرشه چاوه‌ڕوانکراوه‌که‌ی تورکیا و سوپای ئازاد بۆ سه‌ر خاکی سووریا له ماوه‌ی 24 کاژێری داهاتوودا ده‌ست پێبکات''.
گۆڤاری فۆرن پۆلسی باسی له ئاماده‌كاریه‌كانی تورکیا بۆ ده‌ستپێکردنی هێرشه‌که‌ی بۆ سه‌ر باکووری سووریا کردوه.
تورکیا هێز و که‌ره‌سته‌ی سه‌ربازیی به‌رچاوی له سنووره هاوبه‌شه‌کانی له‌گه‌ڵ سووریا جێگیر کردووه و وه‌زاره‌تی به‌رگریی ئه‌و وڵاته‌ش ڕایگه‌یاندووه که ئاماده‌یی ته‌واویان بۆ ده‌ستپێکردنی ئۆپه‌راسیۆن له ڕۆژهه‌ڵاتی فورات هه‌یه.
هاوکات فه‌خره‌دین ئاڵتوون به‌رپرسی ڕاگه‌یاندنی سه‌رۆکایه‌تیی تورکیا ڕایگه‌یاند: هێرشه‌که له ماوه‌یه‌کی "نزیکدا" ده‌ست پێده‌کات و هێزه‌کانی سوپای سووریای ئازادیش به‌شداری ده‌که‌ن و ئه‌و ناوچانه‌ی ده‌که‌ونه ژێر ده‌ستی تورکیا هاوشێوه‌ی عه‌فرین به‌ڕێوه ده‌برێن.
پاش کشانه‌وه‌ی هێزه‌کانی ئه‌مریکا له بنکه‌کانیان له گرێسپی و سه‌رێکانی، حکوومه‌تی تورکیا ڕایگه‌یاند که ئۆپه‌راسیۆنه‌که‌ی بۆ سه‌ر ڕۆژهه‌ڵاتی فورات ده‌ست پێده‌کات که چه‌ندین مانگه خۆی بۆ ئه‌نجامدانی ئاماده ده‌کات.