2019-10-11 1900
بۆردومانكردنی رۆژئاوای كوردستان له‌لایه‌ن توركیاوه به‌رده‌وامه
هێرشی سوپای توركیا بۆ سه‌ر ڕۆژئاوای كوردستان به‌رده‌وامه‌و هێزه‌كانی سورپای دیموكرات -هه‌سه‌ده-ش به‌رده‌وامن له‌به‌رگریی‌و تێكشكاندنی هێرشه‌كانی توركیاو گروپه چه‌كداره‌كانی هاوپه‌یمانی.
ئاوێنه: توپخانه‌كانی توركیا به‌رده‌وامن له‌بۆردومانكردنی رۆژئاوای كوردستان‌و له‌و چوارچێوه‌یه‌دا كه‌مێك له‌مه‌وبه‌ر به‌رزاییه‌كانی مشته‌نوریان له‌كۆبانێ بۆردومان كردو تائێستا زیانه گیانییه‌كان ئاشكرا نه‌كراوه.
هاوكات ئاڵدار خەلیل، ئەندامی دەستەی بەڕێوەبەری تەڤگەری كۆمەڵگەی دیموكراتی -تەڤدەم- لە پۆستێكیدا لەهەژماری تایبەتی خۆی لەتۆڕی كۆمەڵایەتی فەیسبوك نوسیویەتی، "توركیا دەیەوێت بەبەرگێكی نوێ‌و لەژێر ناوێكی تردا، داعش بگەڕێنێتەوە بۆ باكوری سوریا"
ناوبراو ده‌ڵێت، ئەوانەی ئێستا لەگەڵ توركیا دەجەنگن دژی رۆژئاوا، هەر ئەوانەن كە پێشتر لەناوچەكانی روبەڕوبونەوە لەگەڵ هێزەكانی هەسەدە لەرققە هەڵاتبون‌و ئێستا بەهاوكاری توركیا گەڕاونەتەوە.
ئاڵدار خەلیل ئاماژەی بەوەشكردوە، "هێرشی توركیا بۆ سەر باكورو رۆژهەڵاتی سوریا، سەرەتای قەیرانێكی گەورەیە كە ئەردۆغان تێیكەوتوەو دەبێتە سەرەتای روخانی رژێمە تاوانكارەكەی".
له‌لایه‌كی دیكه‌وه ناوەندی راگەیاندنی هێزەكانی سوریای دیموكرات رایگەیاند، سوپای توركیا بۆردومانی پێگەی نور دەكات، كە ناوەندی هێزەكانی هاوپەیمانی نێودەوڵەتی تێدایە.
بەگوێرەی راگەیندراوێكی ناوەندی راگەیاندنی هه‌سه‌ده، سوپای توركیا بەردەوامە لەبۆردومانكردنی ناوچەكانی باكورو رۆژهەڵاتی فورات بەشێوەیەكی هەڕەمەكی، لەو چوارچێوەیەشدا ناوەندێكی هێزەكانی هاوپەیمانیان بەئامانجگرتوە.
ئاماژە بەوەشكراوە، سوپای توركیا بەچەكی قورس هەنگاوێكی مەترسیداری ناوەو پێگەی نوری لەپارێزگای كۆبانێ بەئامانجگرتوە كە ناوەندێكی هێزەكانی هاوپەیمانی نێودەوڵەتی تێدابوە.
به‌پێی تازه‌ترین لێدوانی مەزڵوم عەبدی، فەرماندەی هێزەکانی هەسەدە، لەباشوری ناوچەکانی ژیر کۆنترۆڵیان گروپەکانی نزیک لەئێران هێرشیانکردۆتە سەر هێزەکانیان.
وتیشی، "نیگەرانین لەئەگەری کشانەوەی هێزەکانی ئەمریکا لەبنکەیەکی سەربازی لەکۆبانێ".
باسی لەوەشکرد، "ئەگەر تورکیا هێرشەکانی رانەگرێت ئەوا هێزەکانمان کە پاسەوانی بەندینخانەکانیان لەئەستۆگرتووە کە دەیان چەکدرای داعشی تێدایە دەکشێنینەوە بۆ پاراستنی خێزانی سەربازەکانمان".
فەرماندەی هێزەکانی هەسەدە ڕاشیگەیاند، مەرجیان بۆ دەستپێکردنی دانوستان لەگەڵ تورکیا ڕاگرتنی هێرشەکانە.
سه‌رباری ناڕه‌زاییه نێوده‌وڵه‌تییه‌كان، 9ی ئه‌م مانگه توركیا هێرشی سه‌ربازیی بۆ سه‌ر ڕۆژئاوای كوردستان -باكوری سوریاو خۆرهه‌ڵاتی فورات- ده‌ستیپێكرد.
بەپێی ئامارەکانی نەتەوەیەکگرتووەکان لەماوەی سێ رۆژی رابردودا بەهۆی هێرشەکانی تورکیا بۆ سەر باکوری رۆژهەڵاتی سوریا ده‌یان هاوڵاتی مه‌ده‌نی شه‌هیدو برینداربون‌و نزیکەی 100 هەزار کەسیش ئاوارەبون.