وته‌بێژی هه‌سه‌ده‌ : تورکیا له‌ هه‌ر کوێیه‌وه‌ داخڵ بێت هه‌نگاو به‌ هه‌نگاو به‌ره‌وڕوی به‌رخۆدانی ئێمه‌ ده‌بێته‌وه‌
  2019-10-12       1181       
وته‌بێژی سوپای سووریای دیموکرات (هه‌سه‌ده‌) سه‌باره‌ت به‌ چۆنێتیی دۆخی به‌ره‌ی کورد له‌ ئۆپه‌راسیۆنی سوپای تورکیا بۆ سه‌ر باکووری سووریا ڕایگه‌یاند: تورکیا له‌ هه‌ر شوێنێکه‌وه‌ داخڵ بێت هه‌نگاو به‌ هه‌نگاو به‌ره‌وڕووی به‌رخۆدانی ئێمه‌ ده‌بێته‌وه‌.

ئاوێنه‌: مسته‌فا بالی وته‌بێژی سوپای سووریای دیموکرات له‌ کۆنفڕانسێکی ڕۆژنامه‌وانیدا  سه‌باره‌ت به‌ چۆنێتیی دۆخی به‌ره‌ی کورد له‌ ئۆپه‌راسیۆنی چه‌ند ڕۆژی ڕابردووی سوپای تورکیا بۆ سه‌ر باکووری سووریا رایگه‌یاند: "سوپایه‌کی گه‌وره‌ به‌ره‌وڕوومان بۆته‌وه‌. سوپایه‌ک به‌ ته‌کنۆلۆجیا و که‌ره‌سته‌ی پێشکه‌وتوو. ناهاوسه‌نگییێکی به‌رچاو له‌ ڕووبه‌ڕووبوونه‌وه‌ی کورد و سوپای تورکیا ده‌بینرێت و هێزه‌کانی هه‌ردوولا به‌ هیچ جۆرێك له‌گه‌ڵ یه‌کتر به‌راورد ناکرێن. جگه‌ له‌مه‌ هێزه‌کانی تورکیا ده‌یان هه‌زار هێزی سه‌له‌فی و جیهادگه‌ریان له‌ ئیدلب و شوێنه‌کانی تر بۆ ئه‌م ئۆپه‌راسیۆنه‌ له‌گه‌ڵدایه‌."

ناوبراو ئاماژه‌ی به‌وه‌شدا "ئێمه‌ به‌ڵێن ناده‌ین که‌ تورکیا به‌ هیچ جۆرێك ناتوانێت له‌ مه‌ڵبه‌نده‌کانی ئێمه‌ به‌ره‌وپێش بچێت به‌ڵام ئه‌م به‌ڵێنه‌تان پێده‌ده‌ین: تورکیا له‌ هه‌ر کوێیه‌وه‌ داخڵ بێت هه‌نگاو به‌ هه‌نگاو به‌ره‌وڕووی به‌رخۆدانی ئێمه‌ ده‌بێته‌وه‌. له‌ هه‌ر هه‌نگاوێکدا به‌ره‌وڕووی بوێریی ئێمه‌ ده‌بێته‌وه‌ و ده‌بێ بۆ به‌ره‌وپێشچوونیان هه‌نگاو له‌سه‌ر ئه‌م بوێرییه‌ دابنێت".
زۆرترین بینراو
© 2018 Awene Online, Inc. All Rights Reserved.
×