2019-10-12 1011
سەرۆكی ئەمریكا لەبارەی وەرگرتنی پارە لە سعوودیە رایگەیاند، ''سعوودیە رەزامەندی نیشانداوە پارەمان پێ بدات بەرامبەر هەموو ئەو كارانەی کە بۆی ئەنجامی دەدەین''.
ئاوێنه: دوای ئەوەی وەزارەتی بەرگریی ئەمریكا (پنتاگۆن) رایگەیاندبوو كە هێز و كەلوپەلی بەرگریی زیاتر بە ئامانجی پتەوتركردنی توانای بەرگریی سعوودیە دژبە هەڕەشەكانی ئێران رەوانەی ریاز دەكات، دۆناڵد ترەمپ، سەرۆکی ئەمریکا لە كۆشكی سپی بۆ رۆژنامەوانان دوا و وتی، ''هێزی پشتیوانی رەوانەی رۆژهەڵاتی ناوەڕاست دەكەین بۆ یارمەتیدانی سعوودیە، ئەو (ریاز) رەزامەندی نیشانداوە پارەمان پێ بدات بەرامبەر هەموو ئەو كارانەی بۆی ئەنجامی دەدەین''.
هاوکات دۆناڵد ترەمپ وتیشی، ''سعوودیە خەرجی تێچووی پاڵپشتییەكانی ئەمریكا لە ئەستۆگرتووە و لای خۆمانەوە ستایشی ئەو كارەی سعوودیە دەكەین''.
دوێنێ هەینی وەزارەتی بەرگریی ئەمریكا رایگەیاندبوو كە دوو هەزار سەربازیی دیكە و ژمارەیەك فڕۆكەی جەنگی لەگەڵ سیستەمەكانی بەرگریی “THAAD” و “پاتریۆت” رەوانەی سعوودیە دەكات.