ئەمڕۆ یەكشەممە، لەئاكامی بۆردومانكردنی كاروانێكی مەدەنی لەلایەن سوپای توركیاوە، 11 هاوڵاتی مەدەنی شەهید بون و 74 كەسی دیكەش بریندار بون.
ئاوێنە: بەپێی هەواڵێكی كەناڵی "ئەلحوڕە"، ئەو كاروانی هاوڵاتییە مەدەنیانە، هاوڵاتی عەرەبی ناوچەی "تەل حەمیس" بون كە بەرەو شاری سەرێكانی بەڕێكەوتن بۆ مەبەستی دەربڕینی ناڕەزایەتی خۆیان بەرامبەر بە هێرشەكانی توركیا بۆ سەر ناوچەكە.
بەپێی كەناڵەكە، لەنێو شەهیدەكاندا چەند رۆژنامەنوسێكی ناوخۆ و بیانی هەن.
لەلای خۆیەوە هێزەكانی سوریای دیموكرات لەبەیاننامەیەكدا رایگەیاند، سوپای توركیا كاروانێكی هاوڵاتیانی مەدەنی كردۆتەوە ئامانج كاتێك بەرەو سەرێكانی بەڕێكەوتون تا ناڕەزایەتی خۆیان بەرامبەر بە هێرشەكانی توركیا دەرببڕن و لەو روداوەشدا بەدەیان مەدەنی شەهیدو بریندار بون.
هەسەدە جەختی كردۆتەوە كە توركیا بەبەرچاوی دەزگاكانی راگەیاندنی جیهانەوە لەگەڵ میلیشیا هاوپەیمانەكانی بەردەوامە لە ئەنجامدانی "كۆمەڵكوژی" دژ بە هاوڵاتیانی مەدەنی باكورو رۆژهەڵاتی سوریاو جەنگی "پاكتاویی نەژادی" پیادەدەكات.
هێمای بۆ ئەوەش كردوە كە بۆردومانەكە بەشێوەیەكی راستەوخۆ ئەو كاروانەی هاوڵاتیانی مەدەنی كردۆتە ئامانج.
بەیاننامەكەی هەسەدە بەرپرسیارێتی كۆمەڵكوژی هاوڵاتیانی مەدەنی لەسەر دەستی سوپای توركیا، خستۆتە ئەستۆی كۆمەڵگەی نێودەوڵەتی.