2019-10-17   3249     
هەیکەلییەتی ئەو هێزە توندڕەوەی بە سوپای نیشتمانی (جیش الوطنی) ناسراوە و تورکیا دژی کوردی سووریا بەکاری هێناوە لە دوو بەرەی سەرەکیی سوپای ئازادی سووریا و بەرەی ڕزگاریی نیشتمانی پێکهاتووە و زۆرینەیان جیهادیی توندڕەون.
ئاوێنه: ڕۆژی 9ی ئۆكتۆبهر 2019 تورکیا بە فەرمی هێرشێکی دژی کوردی سووریا دەست پێکرد و ناوی هێرشەکەی ناوە "کانیی ئاشتی"، لەم هێرشەدا تورکیا هێزێکی توندڕەوی بەکارهێناوە کە ناوی سوپای نیشتمانیی لێنراوە و ئەوەش لە چەندین هێزی میلیشیای نەیاری سووریا پێکهاتووە کە زۆرینەیان جیهادی و توندڕەون و بڕبڕە پشتی ئەو هێزە لە دوو بەرەی سەرەکیی "سوپای ئازادی سووریا" و "بەرەی ڕزگاریی نیشتمانی" پێکهاتووە. بەڵام بەگشتی 35 هێزی جۆربەجۆر لە خۆ دەگرێت کە زۆرینەیان جیهادین.
ناوی ئەم گرووپانە کە زۆرینەیان توندڕەون بەم شێوەیە هاتووە:
احرار الشام، جیش الاسلام، صقور الشام، لیوای یەکەمی کەناراوەکان، لواء السلام، الجیش الثانی، جیش النصر، سوپای ئازادی ئیدلیب، ثوار الجزیره، فەوجی 51م، فرقه الشمال، جیش الاحفاد، جیش الشرقیه، فرقه المتعصم، جبهه الشامیه، فیرقەی پێنجەم، لواء الشمال، فەوجی منتصر بالله، لواء سلطان عثمان، رجال الحرب، لواء الاول المغاویر، فوج المصطفی، لیوای نۆیەم، لیوای 23م، فەوجی سەمەرقەند، فەوجی سلطان محمد فاتح، فوج الوقاص، لیوای حەمزه، فەوجی سوڵتان موراد، لواء الفتح، لواء صقور الشمال، احرار الشرقیه، جیش المخا، فیلق الشام، فەوجی سلێمان شا.
21 گرووپی ئەم جیهادییانە پێشتر لەلایەن سیا و پێنتاگۆنەوە پشتگیری کراون و 14 گرووپیشیان بە چەکی دژەتانکی TOW پڕچەک کراون.
ژمارەی ئەم هێزانە بە وردی ڕوون نەبۆتەوە بەڵام باسی 50 و 100 و 110 هەزار چهكدار کراوە.
لە بەیاننامەیهکدا کە دەوترێت ئەو هێزە میلیشیایە ڕۆژی 10ی ئۆكتۆبهر (7 ڕۆژ پێش دەستپێکی هێرشەکەی تورکیا) نووسراوە: "بەزەییتان بە کورد دا نەیەتەوە، بە مستی پۆڵایین لێیان دەن."
ئەو هێزە ڕۆژی 4ی ئۆكتۆبهر لە پرێس کونفڕانسێکدا لەلایەن تورکیاوە و لە شاری شانلی ئۆرفا پێکهێنراوە.