چەند هاوڵاتییەكی مەدەنی بریندار لە نەخۆشخانەی حەسەكە دەڵێن، لەلایەن سوپای توركیاوە بە چەكی نائاسایی بۆردومان كراون، ئەوەش پاڵپستی گومانەكان دەكات لەسەر بەكارهێنانی چەكی فوسفۆڕی سپی لەلایەن ئەو وڵاتەوە لە هێرشەكەیدا بۆ سەر باكوری رۆژهەڵاتی سوریا.
ئاوێنە: ئەو بریندارە مەدەنیانە كە لەئێستادا لە نەخۆشخانەی شەعب لە شاری حەسەكە-ی رۆژئاوای كوردستان چارەسەر وەردەگرن، بە ئاژانسی هاوار نیوز-یان راگەیاندوە، توركیا بە چەكی فۆسفۆڕ بۆردومانی كردون و ئەوەش توشی سوتانی جەستەی كردون.
یەكێك لەو بریندارانە بە ناوی "سیپان"، ئەمڕۆ هەینی، بە هاوار نیوزی راگەیاندوە"جۆری چەكەكە فۆسفۆڕ بوە".
سیپان كە بەشێكی زۆری جەستەی سوتاوە، وتویەتی"چەند هاوڵاتییەكی مەدەنی وێڕای ئەوەی سەدان پێ لە منەوە دور بون بەڵام ئەوانیش لە بۆردومانەكەدا بریندار بون و جەستەیان سوتاوە."
بریندارێكی دیكە كە جەستەی سوتاوە، باسی لەوە كردوە كاتێك بەرەو گوندی "عالیە" لەناوچەی رۆژئاوای تەلتەمر رۆیشتون روبەڕوی بۆردومان بونەتەوە.