2019-10-19   1206     
پارێزگای ههولێر، ئامادهكاریی پێشوهخته بۆ وهرزی باران و ئهگهری لافاو دهكات، بۆ ئهو مهبهستهش، فرسهت سۆفى پارێزگاری ههولێر سهرپهرشتى كۆبوونهوهی لێژنهى بەرگرتن له ئهگهری دروستبوونى لافاو كرد.
ئاوێنه: پارێزگای ههولێر، له راگهیهندراوێكدا، ئاماژه بهوه دهكات، له كۆبوونهوهكهدا باس له ئامادهكارییهكان كراوه له ئهگهری ههستانی لافاو له سنووری پارێزگاى ههولێر له وهرزى باران و زستان و تێكڕاى دامودهزگاكان له ئامادهباشیدا بن بۆ ههر ئهگهرێ و به ئهركى خۆیان ههڵبستن، هاوكات چارهسهری كهموكوڕییهكان بكهن لهو شوێنانه كه ئهگهری ههستانی لافاو ههیه.
به گوێرهی راگهیهندراوی پارێزگای ههولێر، ئامادهیی تهواو راگهیهندراوه بۆ بهشداری تیمهكانى فریاگوزاریی و شارهوانى و بهرگرى شارستانى لهكاتى لافاو، بۆ ئهوهى به كهمترین زیان تێبپهڕێت، بۆ ئهو مهبهستهش ئامێر و ستافهكان و دانانى ژووری عهمهلیاتى فریاگوزاریی بۆ ههر حاڵهتێكى كه پێویست به فریاگوزاری له ئامادهباشیدان.