پۆلیسی سلێمانی
رایگەیاند، لەسەر دۆسیەی كۆشتنی هاوڵاتییەك لەساڵی 1996، هێزەكانیان توانیویانە دو
تۆمەتبار دەستگیربكەن كە لەدوای روداوەكە بۆ دەرەوەی وڵات هەڵهاتبون بەڵام لە
رۆژانی رابردودا گەڕاونەتەوە سلێمانی.
ئاوێنە: بەڕێوەبەرایەتی پۆلیسی پارێزگای سلێمانی، ئەمڕۆ چوارشەممە،
لەڕاگەیەندراوێكدا بڵاویكردەوە، ئێوارەی ڕۆژی 20-7-1996 ، هاوڵاتی (ع. م. ق.) لەدایكبوی 1969، لەكاتی
گەڕانەوەی بۆ ماڵەوە لە شەقامی سالم لە شاری سلێمانی لەلایەن چەند كەسێكەوە بە بەبەردو
چەقۆ لێیدەدرێت و دەكوژرێت و تۆمەتباران هەڵدێن بەرەو دەرەوەی وڵات، دادوەر پەڕاوی
لێكۆڵینەوە بۆ تۆمەتباران دەكاتەوەو بڕیاردەدات بەدەستگیركردنیان بەپێی ماددەی 406
لەیاسای سزادانی عێراقی .
پۆلیسی سلێمانی هێمای بۆ ئەوە كردوە كە لە ڕۆژی 14-10-2019 هێزەكانی پۆلیس زانیارییان
پێگەیشت لەبارەی هەردو تۆمەتبار كە گەڕاونەتەوە شاری سلێمانی، هێزەكانی پۆلیس گەڕان
و بەدواداچونەكانیان دەستپێكردو توانرا تۆمەتباران (د. ع. ع. لەدایكبوی 1976و أ. ر.
ع. لەدایكبوی 1979) لەشاری سلێمانی دەستگیربكرێن .
ئەوەشی
خستۆتەڕو، لە ئێستادا بەفەرمانی دادوەر هەردو تۆمەتبار ڕاگیراون و لەلایەن بنكەی پۆلیسی
رزگارییەوە پەڕاوی لێكۆڵینەوەیان بۆ كراوەتەوەو لێكۆڵینەوەكان بەردەوامن .