2019-10-23   2046     
بەرپرسێكی پێشمەرگە رایدهگهیهنێت ''پێشمەرگە لەسنوری حەمرین كەوتوەتە ئینزارەوەو داعشیەكانی سوریاش ئەگەر بگەڕێنەوە دێنەوە عێراق و حەوزی حەمرین''.
ئاوێنه - ئاراس محهمهد: لیوا محەمەد هەژار ناسراو بە محەمەد سیاسی جێگری میحوەری قەرەتەپەی هێزەكانی پێشمەرگە به ئاوێنەی راگهیاند ''چەكدارەكانی داعش جموجوڵیان زۆر زیاتر بوەو بەئاشكرا لەسنوری حەوزی حەمرین دوو بنكەی ڕاهێنان و سەربازیان هەیەو خەڵك پێ دەگەیەنن و لێیی كۆدەبنەوە''
ناوبراو وتیشی ''ئێستا من سێ ڕبایەی پێشمەرگەم خستوەتە ئینزارەوە لەسنوری حەمرین و لەنزیك دوز''.
وتیشی ''ئەو چەكدارانەی كە لە سوریا هەڵدێن هەرچی عێراقی بێت و ناوداری داعش بێت بەگومانی ئێمە دێتەوە بۆ حەوزی حەمرین چونكە ئەوە لەمێژە مۆڵگەیانە و لە ساڵەكانی (٢٠٠٥) وە لەكاتی قاعیدەوە لەوێ خۆیان ڕێك دەخەنەوە''.
حەوزی حەمرین دەكەوێتە سنوری دیالەو ناوچەیەكی سەخت و شاخاوی و دارستانی چڕەو جێگایی مۆڵگەو خۆحەشردانی زۆری هەیە بۆ چەكدارەكانی داعش .
لیوا محەمەد وتیشی ''تائێستا ناوێكی دیار و بەرپرسی داعش نەگەڕاوەتەوە سنورەكە بەڵام پێش بینیمان وایە كەبەم زوانە بێنەوە بۆ ئەو سنورە''.
لەئێستادا پاشماوەی داعش بەشێوەی پارتیزانی لەسنوری دیالەو حەویجەو تكریت و دوز ناوبەناو چالاكی ئەنجام دەدەن و دواتر دەگەڕێنەوە شوێنەكانی خۆیان .