بەپێی میدیا عێراقییەكان، سەرلەبەیانی ئەمڕۆ شەممە، خۆپیشاندەرانی گۆڕەپانی تەحریر هەوڵی پەڕینەوە لە پردی كۆماری بەرەو ناوچەی سەوز دەدەن بەڵام هێزە ئەمنییەكان روبەڕویان بونەتەوە.

ئاوێنە: ماڵپەڕی "سومەریەنیوز" لەزاری سەرچاوەیەكی ئەمنییەوە بڵاویكردەوە، خۆپیشاندەرانی گۆڕەپانی تەحریر لەناوەڕاستی بەغدا هەوڵیاداوە لە پردی كۆماری بەرەو ناوچەی سەوز بپەڕنەوە.

هێمای بۆ ئەوەش كردوە كە هێزە ئەمنییەكان بە گازی فرمسێكڕێژ وەڵامی هەوڵەكەی خۆپیشاندەرانیان داوەتەوە.

خۆپیشاندەرانی گۆڕەپانی تەحریر دوێنێ هەینی لە گۆڕەپانەكە دەستیان بە مانگرتنێكی كراوە تا وەڵامدانەوەی داخوازییەكان كرد.

بەشێكی زۆری ئەو خۆپیشاندەرانە، دوای ئەوەی دوێنێ رۆژێكی خوێناوییان بەڕێكرد، شەو لە گۆڕەپانەكە مانەوە.

بەپێی كۆمسیۆنی مافی مرۆڤی عێراق لە خۆپیشاندانەكانی دوێنێی بەغداو شارەكانی دیكەدا 30 كەس كوژراون كە بەگوێرەی سەرچاوە ئەمنییەكان لەو ژمارەیە نۆ كەسیان لە بەغدا كوژراون.