ئاژانسی رۆیتەرز لەزاری چەند سەرچاوەیەكی نزیك لە گەورە بەرپرسانی عێراقەوە بڵاویكردەوە، ئێران لەڕێگەی قاسم سولەیمانی، فەرماندەی فەیلەقی قودسی سوپای پاسدارانەوە، دوێنێ چوارشەممە، دەستوەردانی كردوە بۆ رێگریكردن لە دورخستنەوەی عادل عەبدولمەهدی لە پۆستی سەرۆك وەزیرانی عێراق.

ئاوێنە: موقتەدا سەدر، رابەری رەوتی سەدر پێشەنگی ئەو كەسانەیە كە داوای دەستلەكاركێشانەوەی عادل عەبدولمەهدی، سەرۆك وەزیرانی عێراقی كردبو بۆ هێوركردنەوەی ئەو دۆخەی كە بەهۆی خۆپیشاندانەكانەوە ماوەی چەند رۆژێكە دروست بوەو بۆ ئەوەش لەم هەفتەیەدا داوای لە هادی عامری، سەرۆكی هاوپەیمانی فەتح، كە ركابەری سەرەكییەتی، كردبو، هاوكاری بێت لە خستنی عادل عەبدولمەهدیدا.

بەڵام بەگوێرەی قسەی پێنج سەرچاوە بۆ رۆیتەرز، دوێنێ چوارشەممە لە بەغدا، لەكۆبونەوەیەكی نهێنیدا، قاسم سولەیمانی، فەرماندەی فەیلەقی قودسی سوپای پاسدارانی ئێران دەستوەردانی كردوەو داوای لە عامری و سەركردەكانی حەشدی شەعبی كردوە بەردەوام بن لە پشتیوانیكردنی عادل عەبدولمەهدی.

هاوپەیمانی فەتح كە خاوەنی دوەم گەورەترین كوتلەی نێو پەرلەمانە، لە ئێرانەوە نزیكە.

بەرپرسێكی ئەمنی ئێرانی ئەوەی بۆ رۆیتەرز پشتڕاست كردۆتەوە كە قاسم سولەیمانی لەكۆبونەوەكەدا ئامادەبوە بەڵام بەپێی قسەی ئەو بەرپرسی، ئامادەبونی تەنها بۆ پێدانی چەند ئامۆژگارییەك بوە.

ئەو بەرپرسە ئاماژەی بەوەداوە كە ئاسایشی عێراق بۆ ئەوان گرنگەو پێشتریش لەم روەوە هاوكاری عێراقیان كردوەو وتوشیەتی"سولەیمانی ناوبەناو دەچێتە عێراق و هەندێك لەوڵاتانی دیكەی ناوچەكە، بەتایبەت ئەو كاتانەی لەلایەن هاوپەیمانەكانمانەوە داوای هاوكاریمان لێدەكرێت."