دو کتێبی دیکەی نەوشیروان مستەفا چاپ دەکرێن
  2019-02-03       3574       

دو کتێبی دیکەی نەوشیروان مستەفا ئەمین لە بواری ئەدەبدا چاپ دەکرێن کە پێش کۆچی دوایی نوسیونی و بڕیارە لە دوەم ساڵیادی کۆچی دواییدا بڵاو بکرێنەوە.

ئاوێنه‌: مەجید ساڵح، سەرپەرشتیاری لەچاپدانی کتێبەکانی (نەوشیروان مستەفا ئەمین) بۆ میدیای گۆڕان ئاشکرای کرد؛ لە ئەرشیفی کاک نەوشیروان مستەفا کتێبێکی نوێ دۆزراوەتەوە بە ناوی (گه‌شتێ له‌گه‌ڵ سالم) کە قەبارەکەی 250 لاپەڕەیە، بەشەکانی کتێبەکە پێکهاتون لە:1.قاڵبه‌ شیعریه‌کانی مه‌دره‌سه‌ی بابان (سالم وه‌ک نمونه). 2.بابه‌ته‌کانی شیعری سالم، هه‌ندێ لایه‌نی ژیانی کۆمه‌ڵایه‌تی.

وتیشی"هەروەها کتێبێکی دیکەی بەناوی (نەوەی دوەمی قوتابخانەی بابان)، کە تایبەتە بە شاعیران (حاجی قادر کۆیی، وەفایی، حەریق، شێخ رەزای تاڵەبانی) لە ئەرشیفی تایبەتی کاک نەوشیروان و دوای کۆچی دوایی لەناو کۆمپیوتەرەکەیدا دۆزراوەتەوە."

ئاشكراشیكرد"بڕیارە لە دوەم ساڵڕۆژی کۆچی دواییدا، لە درێژەی زنجیرەی کتێبی بەدەم رێگاوە گوڵچنین هەندێک لە کتێبە چاپ نەکراوەکانی لە چاپ بدرێت."

بەوتەی مەجید ساڵح، ئەو کتێبانە تایبەتن بە بواری ئەدەب و لە چوارچێوەی بەرگی سێیەم و چوارەمی کتێبی یەکەمی بەدەم رێگاوە گۆڵچنین چاپ دەکرێن.

ساڵی رابردو لە یەکەم ساڵیادی کۆچیی دواییدا، کتێبێکی دیکەی رەوانشاد نەوشیروان مستەفا بڵاوکرایەوە بەناونیشانی (کورد و کوردستان لە رۆژنامەی تێگەیشتنی راستی و گۆڤاری "لغة العرب"دا).

زۆرترین بینراو
© 2018 Awene Online, Inc. All Rights Reserved.
×