باڵیۆزخانەی
ئەمریكا لەبەغدا ئیدانەی كوشتن و رفاندنی خۆپیشاندەرانی عێراقی دەكات و دەشڵێت؛
پێویستە حكومەتی عێراق و سەركردە سیاسییەكان وەڵامی خێرایان هەبێت و جدی بن
بەرامبەر بە داخوازییەكانی خۆپیشاندەران.
ئاوێنە: باڵیۆزخانەی
ئەمریكا لەبەغدا، ئەمڕۆ چوارشەممە، لەبەیاننامەیەكدا رایگەیاند، ویلایەتە
یەكگرتوەكانی ئەمریكا زۆر گرنگی بە بەردەوامبونی پشتیوانی عێراقێكی ئارام و
پێشكەوتو دەدات بەشێوەیەك بتوانێت بەرگری لە گەلەكەی بكات دژ بە گروپە توندڕەوەكان
و وەڵامدانەوەی ئەوانەی پێشێلی سەروەری و دیموكراتییەكەی دەكەن.
هێمای بۆ ئەوەش
كردوە"لەكاتێكدا كە جیهان چاودێری روداوەكانی عێراق دەكات، ئەوەش رون بۆتەوە
كە پێویستە حكومەتی عێراق و سەركردە سیاسییەكان وەڵامی خێرایان هەبێت بۆ ئەو
هاوڵاتیانەی كە داوای چاكسازی دەكەن و داواكانیان بەجدی وەربگرن، عێراق هیچ
ئایندەیەكی نابێت بە سەركەوتكردنی ئیرادەی گەلەكەی."
جەختیشی
كردۆتەوە"ئیدانەی كوشتن و رفاندنی خۆپیشاندەرانی بێچەك و هەڕەشە لەسەر ئازادی
بیروڕا و بەردەوامی توندوتیژی دەكەین. دەبێت عێراقییەكان ئازاد بن لە وەرگرتنی
بڕیاری تایبەت بە ئایندەی وڵاتەكەیان."