مستەفا سەید قادر، جێگرى سەرۆکى هەرێمى کوردستان رایگەیاند: هەوڵدەدەین هەمو کێشەکانى نێوان هەرێم و بەغدا بە قازانجى خەڵکى هەرێم چارەسەر بکەین.

ئاوێنە: لەکاتی بەشداریکردنى لە یەکەمین پێشەنگاى نێودەوڵەتى کتێب لە شارى سلێمانى، مستەفا سەید قادر جێگرى سەرۆکى هەرێمى کوردستان لە بارەى ئامانجى سەردانەکەى سەرۆکایەتى هەرێم بۆ بەغدا، بە رۆژنامەنوسانی راگەیاند: لەگەڵ بەرپرسانى عیراق باسمان لە هەمو کێشە هەڵپەسێراوەکانى نێوان هەرێم و ناوەند کردوە و هەوڵدەدەین رێگە چارەیان بۆ بدۆزینەوە بۆ ئەوەى ژیان و گوزەرانى خەڵکى کوردستان و عێراق پێداچونەوەى پێبکرێت.

وتیشى "بەگشتى باسى زۆرشت کراوە و بۆ وردەکارییەکانیش لیژنەى پێویست دروست دەکرێت بۆ ئەوەى بتوانین لە داهاتودا گفتوگاکان بەردەوامبن و چارەسەرى پێویستیان بۆ بدۆزینەوە.

لە بارەى بەردەوامبونى بەغدا بۆ ناردنى موچەى فەرمانبەرانى هەرێمى کوردستان بۆ ساڵى داهاتو، مستەفا سەید قادر ئاماژەى بەوە کرد، پرسێکى گرنگە و ئومێد دەکەن بە قازانجى خەڵکى هەرێمى کوردستان چارەسەرى بکەن.

ئەم لێدوانەى جێگرى سەرۆکى هەرێم لە کاتێکدایە، دوێنێ چوارشەممە، وەفدێکى سەرۆکایەتى هەرێمى کوردستان سەردانى بەغدایان کردو لەگەڵ هەرسێ سەرۆکایەتییەکەى عێراق و بەرپرسانی دیکەی ئەو وڵاتە لە بارەى کێشەکانى نیوان هەولێر و بەغدا کۆبونەوە.