2019-11-14   947     
فەرماندەی گشتیی هێزەکانی سوریای دیموکرات (هەسەدە)، مەزڵوم کۆبانی لە پەیامێکدا ئاماژەی دا بە دیداری نێوان ئەردۆغان و ترەمپ لە واشنتن و ڕایگەیاند: ''دوای ڕاگەیاندنی ئاگربەست هێزەکانی تورکیا 1100 کیلۆمەتری چوارگۆشە لە خاکی سووریایان داگیر کردووە''.
ئاوێنه: شەوی رابردوو دۆناڵد ترەمپ، سەرۆکی ئەمریکا، لەکاتی پێشوازی کردنی لە رەجەب تەیب ئەردۆغان، سەرۆک کۆماری تورکیادا لە کۆشکی سپی رایگەیاند ئاگربەست لە سووریا بەشێوەیهکی باش بەردەوامە، بەڵام مەزڵوم کۆبانی لە تویتێکدا کە ترەمپ-یشی تاگ کردووە، رایگەیاند ''لەکاتی کۆبوونەوەی نێوان ئەردۆغان و ترەمپ-دا، هێزەکانی تورکیا هێرشی چڕیان کردۆتەوە سەر شارۆچکەی تلتەمر کە زۆربەی دانیشتوانەکەی مەسیحین''.
ئاماژهی بهوهشداوه، هێرشەکە بۆتە هۆی ئاوارەبوونی ژمارەیهکی زۆری دانیشتوانی ناوچەکە.
فەرماندەی گشتی هەسەدە وتوویەتی، ''ئەمە پێشێل کردنی ئاشکرای ئاگربەستەکەیە''.
مەزڵوم کۆبانی ئاشکراشی کردوە، ''لەکاتی راگەیاندنی رێککەوتنەکەی نێوان ئەمریکاو تورکیاوە سەبارەت بە باکووری سووریا تا ئێستا تورکیا یەک هەزار و سەد کیلۆمەتر چوارگۆشەی لەناوچەکە داگیرکردووە.''