ئه‌ندامێكی ئه‌نجومه‌نی پارێزگای كه‌ركوك له‌كوتله‌ی یه‌كێتی پێی وایه‌ بردنی كۆبونه‌وه‌ی ئه‌نجومه‌نی پارێزگای كه‌ركوك بۆ هه‌ولێر "كارێكی بێ مانایه‌"و ئه‌ندامێكی پارتیش له‌ ئه‌نجومه‌نه‌كه‌ ده‌ڵێت؛ ره‌نگه‌ كۆبونه‌وه‌كه‌ ببێته‌ كۆبونه‌وه‌یه‌كی راوێژكاری.
ئاوێنه‌: دوێنێ سێشەممە، هەردو مەکتەبى سیاسى یەکێتى و پارتى لەهەولێر کۆبونەوە، بڕیاریان دا رۆژى 18 ى ئەم مانگە، کۆبونەوەیەکى ئەنجومەنى پارێزگاى کەرکوک لە شارى هەولێر ئەنجام بدرێت.
کامەران کەرکوکى، ئەندامى ئەنجومەنى پارێزگاى کەرکوک لە كوتله‌ی پارتى، بە دورى زانى لە کۆبونەوەکەدا پارێزگار بۆ کەرکوک هەڵبژێردرێت، بە دەنگى ئەمەریکاى راگەیاند"جگە لە عەرەب و تورکمان، لەنێو کوردیشدا ناڕەزایەتى لە ڕێکخستنى کۆبونەوەکە هەیە، بۆیە ڕەنگە کۆبونەوەکە ببێتە کۆبونەوەیەکى ڕاوێژکارى."
کوتلەى عەرەبى و تورکمانى، بەشدارى کۆبونەوەى ئەنجومەنى پارێزگا لە هەولێر ناکەن، ئەندامە یەکێتیەکانى ئەنجومەنیش دژى بردنى کۆبونەوەى ئەنجومەنى پارێزگان بۆ هەولێر.
ئازاد جەبارى، ئەندامى کوتلەى یەکێتى لە ئەنجومەنى پارێزگاى کەرکوک، ئاماژەى بەوەکرد بەشداربونى ئەوان لە کۆبونەوەکەى هەولێر، پەیوەندى بە بڕیارى سەرکردایەتى یەکێتیەوە هەیە، وتى"بەڵام خۆم، گەر پێم بکرێت، بەشدار نابم."
وتیشى"بردنى کۆبونەوەى ئەنجومەنى پارێزگا بۆ هەولێر بێ مانایە، کورد بەدواى بنکڕەکەیدا دەگەڕێت."
لاى خۆشیەوە جوان حەسەن، ئەندامى کوتلەى یەکگرتوى ئیسلامى لە ئەنجومەنى پارێزگاى کەرکوک، ئاماژەى بەوەکرد ئەوان تەنها لە ڕاگەیاندنەکانەوە، هەواڵى کۆبونەوەى ئەنجومەنى پارێزگایان لە ڕۆژى 18 ى ئەم مانگە لە هەولێر بیستوە، وتى"جارێک لە سەرکردایەتى یەکگرتوەوە، بڕیارى بەشداریکردن یاخود نەکردنمان بۆ نەهاتوە."