دەستەی گشتی گومرگەكانی عێراق بڕیاری دا بە هەڵگرتنی خاڵە گومرگییەكانی "فایدە، شێراوا، لەیلان" و داواش لەسەرجەم دەروازە سنورییەكان بەوانەی هەرێمی كوردستانیشەوە دەكات كە پابەندبن بە بڕیاری یەكخستنی رێكارو رسوماتە گومرگییەكانەوە. 
ئاوێنە: دەستەی گشتی گومرگەكانی عێراق ئەمڕۆ هەینی لەبەیاننامەیەكدا سەبارەت بە جێبەجێكردنی بڕیاری ئەنجومەنی وەزیرانی عێراق تایبەت بە یەكخستنی رێكارو رسوماتە گومرگییەكانەوە لە سەرجەم دەروازە سنورییەكان، ئاشكرایكرد كە ئەو بڕیارە لە 17ی ئەم مانگەوە دەبێت لەسەرجەم دەروازە سنورییەكان بەوانەی هەرێمی كوردستانیشەوە جێبەجێ بكرێت. 
لەبەیاننامەكەی دەستەی گشتی گومرگەكانی عێراقدا هێما بۆ ئەوە كراوە لەڕۆژی 17ی ئەم مانگەوە دەستەكەیان و گومرگەكانی هەرێمی كوردستان دەست دەكەن بە جێبەجێكردنی ئەو بڕیارەی ئەنجومەنی وەزیران كە هەنگاوێكی گرنگە بۆ رێكخستنەوەی بازرگانی و جموجوڵی هەناردەو هاوردەكردن. 
بەپێی راگەیەندراوەكە بڕیارەكە زامنی یەكخستنی روسوماتی گومرگی دەكات لەسەرجەم دەروازە سنورییەكاندا بەوانەی هەرێمی كوردستانیشەوە كە بەم شێوەیە ناوی بردون(پەروێزخان، باشماخ، ئیبراهیم خەلیل، حاجی ئۆمەران، فڕۆكەخانەی هەولێر، فڕۆكەخانەی سلێمانی.) 
ئەوەشی خستۆتەڕو كە پسوڵەی گومرگی یەكگرتو بەهەردو زمانی عەرەبی و كوردی دەبێت ئەوەش بەپێی یاسای گومرگەكان.
جەختیشی كردۆتەوە كە دەبێت سەرجەم دەروازە سنورییەكانی پارێزگاكان و هەرێمی كوردستان پابەندبن بەو بڕیارانەوە كە لە ئەنجومەنی وەزاریرانەوە لەپەیوەست بە پاراستنی بەرهەمی نیشتمانی و كشتوكاڵی دەردەچن.
وتوشیەتی"بڕیارەكە هەڵگرتنی خاڵە گومرگییەكانی ئێستا لە هەریەك لە (فایدەو شێراوا لە باكوری كەركوك)و (لەیلان لە رۆژهەڵاتی كەركوك) لەخۆدەگرێت."