سبەی وەفدێكی هەرێم بۆ تاوتوێكردنی پرسی نەوت و بودجە دەچێتە بەغدا
  2019-11-22       251       

بەپێی قسەی پەرلەمانتارێكی یەكێتی لەپەرلەمانی عێراق بڕیارە سبەی وەفدێكی هەرێمی كوردستان بۆ تاوتوێكردنی پرسی نەوت و بودجە سەردانی بەغدا بكات و دەشڵێت، حکومەتی عێراق ئەو دڵنیاییەی داوەتە ئێمە کە جارێکی دیکە موچەی فەرمانبەرانی هەرێمی کوردستان لە بەغداوە نابڕدرێت.

 ئاوێنە: رێبوار تەها، پەرلەمانتاری یەكێتی و جێگری سەرۆکی لیژنەی نەوت و غازو سامانە سروشتیەکان لەپەرلەمانی عێراق، بە روداوی راگەیاند"حکومەتی هەرێمی کوردستان هەنگاوی باشی ناوە بۆ ئەوەی پەیوەندییەکانی لەگەڵ بەغدا بەرەوپێش بچێت و مامەڵەیەکی تەندروست لە مەلەفی نەوت و بودجەی گشتی عێراق بکرێت".

 رێبوار تەها، وتیشی"حکومەتی ئیتحادی ئەو دڵنیاییەی داوەتە ئێمە و ئێمەش ئەو دڵنیاییە بە خەڵکی کوردستان و بە تایبەتیش فەرمانبەران و موچەخۆران دەدەین، کە جارێکی دیکە موچەی فەرمانبەرانی هەرێمی کوردستان لە بەغداوە نابڕدرێت، هاوکات لە یەک نزیکبونەوەیەکی تەواو لەنێوان هەردو حکومەتدا هەیە...ئەمەش مایەی دڵخۆشییەو هەنگاوی باشیش نراوە، دەتوانم بڵێم نەرمییەکی تەواو لەلایەن هەرێمی کوردستانەوە پیشانی بەغدا دراوە، کە دەیانەوێت لە چوارچێوەی یاسای بودجە مامەڵە لەگەڵ بە‌غدا بکەن بە رادەستکردنی 250 هەزار بەرمیل رۆژانە بە سۆمۆ و لە بەرامبەریشدا بودجەو موچەی فەرمانبەران رەوانە بکرێت".

بە وتەی پەرلەمانتارەكەی یەكێتی، بڕیارە سبەی وەفدێكی هەرێمی کوردستان سەردانی بەغدا بکات و "لە بەغداش بەدڵنیاییەوە چاویان بە بەڕێز عادل عەبدولمەهدی و چەند وەزیرێک دەکەوێت و تاوتوێی پرسی نەوت و بودجە دەکەن."

زۆرترین بینراو
© 2018 Awene Online, Inc. All Rights Reserved.
×