وەزارەتی ناوخۆی هەرێم رایگه‌یاند به‌مه‌به‌ستی نه‌هێشتنی دیارده‌ی چه‌كداری بڕیاریانداوه‌ دەست بە هەڵمه‌تێک بۆ داماڵینی چه‌ك بكه‌ن تا هەمو جۆرە چەکێکی قورس و مامناوەند تەنها له‌ده‌ست هێزه‌ چه‌كداره‌كانی حكومه‌تدا بێت.

ئاوێنه‌: وەزارەتی ناوخۆی هەرێمی کوردستان، ئه‌مڕۆ یه‌كشه‌ممه‌ لەبه‌یاننامه‌یه‌كدا رایگه‌یاند؛ به‌مه‌به‌ستی نه‌هێشتنی دیارده‌ی چه‌كداری به‌تایبه‌ت چه‌كی قورس و مامناوه‌ندو هێشتنه‌وه‌ی ئه‌و چه‌كانه‌ ته‌نها له‌ده‌ست هێزه‌ چه‌كداره‌كانی حكومه‌تی هه‌رێمی كوردستاندا بڕیارماندا به‌ داماڵینی گشت چه‌ك و ته‌مه‌نییه‌ك جگه‌ له‌ ده‌مانچه‌و كڵاشینكۆف.

به‌پێی به‌یاننامه‌كه‌ بڕیاردراوه‌ ده‌ست به‌سه‌ر ئه‌و چه‌كه‌ بێمۆڵه‌تانه‌شدا بگیرێت كه‌ له‌لایه‌ن هاوڵاتیانه‌وه‌ هه‌ڵده‌گیرێت و هه‌روه‌ها رێكاری یاسایی به‌رامبه‌ریان بگیرێته‌به‌ر.

وەزارەتی ناوخۆ ئاماژەی بەوەشکردوە "لە سەنتەری ھەر پارێزگا و قەزا و ناحیەیەك لە بەڕێوەبەرایەتییەكانی پۆلیس و ئاسایش بنكەی كۆكردنەوەی ئەو چەكانەی رادەستدەكرێن، یان دەستی بەسەردا دەگیرێت كۆدەكرێنەوە و لەلایەن لیژنەیەكی تایبەتمەندەوە جەرد دەكرێن و رادەستی وەزارەتی پێشمەرگە دەكرێن."

ڕونیشکراوەتەوە "لە رێگای دەزگاكانی راگەیاندن ئاگاداری گشت ھاوڵاتیان دەكرێت ئەوانەی دەمانچە و كلاشینكۆفی بێمۆڵەتیان ھەیە لەو بنكانە تۆماری بكەن و ئەو چەكانەی كە لە بڕگەی (1)ی سەرەوە ئاماژەی پێكراوە رادەستی بكەن."

ئه‌وه‌ش خراوه‌ته‌ڕو "دوای كۆتاییھاتنی ئەو ماوەیه‌ی دیاری كراوە ھەر چەكێك دەستی بەسەردا بگیرێت خاوەنەكەی بەپێی یاسای چەك رەوانەی دادگا دەكرێت."