ئەنجومەنی باڵای
فەتوای هەرێم لەبارەی حوكمی سەركەوتنی ژنان بەتەنها لەگەڵ شوفێری تاكسی و حوكمی ئەو
پارەیەی كە شوفێرەكە وەریدەگرێت رونكردنەوەیەكی بڵاوكردەوە.
ئاوێنە: ئەنجومەنی باڵای فەتوا ئاماژەی بەوەداوە
هۆكاری دەركردنی ئەو فەتوایە دەگەڕێنێتەوە بۆ زۆربونی روداوی ناشەرعی و جەریمەو
تاوانی كۆمەڵایەتی و پرسیاری هاوڵاتیان لەو بارەیەوە، لەبەشێكی فەتوایەكەدا هاتوە:
دەرچونی ژن لەگەڵ مەحرەمی خۆیدا هەركاتێك بێت بۆ هەر جێگەیەك بێت دروستەو شایستەیەو
ئەسڵ وایە بەوشێوەیە بێت.
رونیشیكردوتەوە:
هەر كاتێك ژنەكە یان شوفێرەكە یان هەردوكیان لە كەوتنە نێو داوی گوناهوتاوان و كاری
ناشەرعی لە خۆیان دەترسان، بەهەر هۆیەك بێت، تەنانەت ئەگەر دوای سەركەوتنی ژنەكەش
بێت بۆ ناو ئۆتۆمبێلەكە، پێویستە ژنەكە لەگەڵ شوفێرەكە سەرنەكەوێت و داببەزێت، یان
شوفێرەكە داوای دابەزینی لێبكات ئەگەر ژنەكە دانەبەزی پێویستە دەمودەست شوفێرەكە
دابەزێتو نەیگەیەنێت.
لەبەشێكی تری فەتواكەدا
هاتوە: پێویستە ژن بەشەوان بەتەنها لەگەڵ شۆفێری نامەحرەم و تاكسی دەرنەچێت، مەگەر
دڵنیا بێت بۆ كارێكی زۆر پێویست و زەروریە، جگە لەوەش پێویستە ژن بەتەنها لەگەڵ شۆفێری
نامەحرەم بۆ دەرەوەی شارو دور لەئاوەدانی دەرنەچێت.
لەبارەی ئەو كرێیەشی
كە خاوەن تاكسی لەژنی وەردەگرێت، دەڵێت: ئەو پارەیە حەڵاڵە ئەگەر نەكەوتە ناو حەرام
یان كارەكەی بەكارنەهێنا بۆ بەدواكەوتنی كاری ناشەرعی.