تۆڕی كۆمەڵایەتی تویتەر، لە دوێنێ پێنجشەممەوە هەژماری قەیس خەزعەلی، ئەمینداری گشتی عەسائیبی ئەهلی هەقی سەربە حەشدی شەعبی راگرتوەو نوسینگەی ناوبراویش لەوبارەیەوە رونكردنەوەیەكی بڵاوكردەوە.

ئاوێنە: كاتێك دەتەوێت بچیتە ناو هەژماری خەزعەلی لە تویتەر پەیامێكی هۆشداری دەبینی كە تێیدا نوسراوە، ئەم هەژمارە بەشێوەیەكی كاتی راگیراوە بەهۆی بونی چالاكی نائاسایی.

راگرتنی هەژمارەكەی خەزعەلی دوای ئەوە دێت كە رۆژی دوشەممە هۆشداری دابو لەوەی كە خۆپیشاندانەكانی رۆژی سێشەممەی بەغدا كوژراوی زۆری لێدەكەوێتەوەو بانگەوازەكانیش بۆ خۆپیشاندانی چەند ملیۆنی لە پایتەختی عێراق بە پلانێكی "هەواڵگری و قێزەون" ناوبردبو.

خەزعەلی هەروەها بەر لە راگرتنی ئەكاونتەكەی، دوێنێ لە تویتێكدا نوسیبوی "تاكەی پشێوی و غیابی یاسا و لاوازی هێزە ئەمنییەكان و بەربڵاوی چەك و میلیشیا قێزەونەكان بەردەوام دەبێت." ئەوەش روبەڕوی رەخنەی گاڵتەئامێزی چالاكوانان بوەوە.

یەكێك لە چالاكوانانی عێراقی لەتویتەر لەگەڵ دانانی وێنەیەكی ئەو تویتەی خەزعەلیدا، وەك تانەیەك ناوبراوی بە "چالاكوانی مەدەنی و ئەندامی لیژنەی مافی مرۆڤی نێودەوڵەتی" ناوبردوە.

ئەمڕۆش نوسینگەی راگەیاندنی ئەمینداری گشتی عەسائیبی ئەهلی هەق لە رونكردنەوەیەكدا رایگشتی ئاگاداركردۆتەوە كە دوای "رێكارە بێ پاسەوەكان"ی تویتەر بۆ راگرتنی هەژماری قەیس خەزعەلی، كەسێك هەڵساوە بە دروستكردنی هەژمارێكی وەهمی بەناوی ناوبراوەوە كە تویتی ناڕاست و هەڵبەستراوی تێدا بڵاودەكاتەوە.