روانگەی سوری بۆ مافەكانی مرۆڤ ئاشكرایكرد كە ئێوارەی دوێنێ چوارشەممە نزیكەی 240 چەكداری رێكخراوی داعش لەدوا مۆڵگەكانی ئەو رێكخراوە لە "باغۆز" سەر بە هەجین لە پارێزگای دێرەزور-ی رۆژهەڵاتی فوڕات، خۆیان رادەستی شەڕڤانانی هێزەكانی سوریای دیموكرات(هەسەدە) و هاوپەیمانان كردوە.

ئاوێنە: روانگەی سوری بۆ مافەكانی مرۆڤ لەزاری چەند سەرچاوەیەكی باوەڕپێكراوەوە بڵاویكردۆتەوە كە كاروانێك ئۆتۆمبێل كە لە حەوت بارهەڵگر پێكهاتون و لەلایەن ئۆتۆمبێلە سەربازییەكانی هەسەدەو هاوپەیمانانەوە بەرو دوایان گیرابو، ئێوارەی دوێنێ لەدوا مۆڵگەی رێكخراوی داعشەوە خۆیان رادەستی شەڕڤانان و هێزەكانی هاوپەیمانان كردوە.

هێمای بۆ ئەوەش كردوە كە ئەو حەوت بارهەڵگرە نزیكەی 240 چەكداری داعش-یان تێدابوە كە زۆرینەیان چەكداری بیانی بون و خۆیان رادەستی هەسەدەو هێزەكانی هاوپەیمانان كردوە.
روانگەی سوری بۆ مافەكانی مرۆڤ ئەو خۆڕادەستكردنەی چەكدارانی داعشی بە گەورەترین پرۆسەی خۆرادەستكردن ناوبردوە.

ئەوەشی خستۆتەڕو كە رێكخراوی داعش لەئێستادا لەدوا مۆڵگەكانیدا بەتەواوی گەمارۆ دراوەو ئێستا تەنها سەدان مەتر لەخاكی لەژێر كۆنترۆڵدا ماوەو چاوەڕوان دەكرێت لەماوەی چەند كاتژمێری داهاتودا بەتەواوی كۆتایی بەو رێكخراوە لە ناوچەكانی رۆژهەڵاتی فوڕات بهێنرێت.