ئەمجەد عوقابی،
پەرلەمانتاری كوتلەی سائیرون ئەمڕۆ پێنجشەممە رایگەیاند كە ئەوان
دەستلەكاركێشانەوەی بەرهەم ساڵح، سەرۆك كۆماری عێراق پەسەندناكەن و هێمای بۆ ئەوەش
كرد كە كوتلەكەیان پشتیوانی لە هەڵوێستی بەرهەم ساڵح دەكات بۆ رەتكردنەوەی
راسپاردنی كەسایەتییەكی حزبیی بۆ پۆستی سەرۆك وەزیران.
ئاوێنە: ئەمجەد
عوقابی لە لێدوانێكدا بە ماڵپەڕی "سومەریەنیوز"ی راگەیاند"ئێمە
پشتیوانی لە هەڵوێستی بەرهەم ساڵح، سەرۆك كۆماری عێراق دەكەین بۆ بەرگریكردن لە
داخوازی جەماوەر و هەروەها هەڵوێستی ئەو بۆ رەچاونەكردنی خواستی ئەو هێزانەی كە
دەیانەوێت كاندیدێكی حزبی بسەپێنن بەرزدەنرخێنین."
ئەو پەرلەمانتارەی سائیرون
وتی"كوتلەكەمان بەوپەڕی تواناوە پشتیوانی لە سەرۆك كۆمار دەكات و رێگە نادەین
بە دەستلەكاركێشانەوەی چونكە هەڵوێستەكەی دەربڕی داخوازی جەماوەرەو پشتیوانیكردنە
لە مافەكانی جەماوەر و دورخستنەوەی حزبییەكان و بەدیهێنانی داخوازییەكانی خەڵك."
ئەوە
لەكاتێكدایە ئەمڕۆ سەرۆك كۆماری عێراق ئامادەیی خۆی دەربڕی كە
دەستلەكاركێشانەوەی خۆی بخاتە بەردەم ئەنجومەنی نوێنەران و هەروەها رەتیشیكردەوە كە كاندیدی هاوپەیمانی بونیاد، ئەسعەد عیدانی بۆ سەرۆكایەتی
حكومەتی داهاتو رابسپێرێت.