كوتلەی حیكمە لە
پەرلەمانی عێراق و ئیئتیلافی نەسر بەجیا دەستلەكاركێشانەوەی بەرهەم ساڵح، سەرۆك
كۆماری عێراق رەتدەكەنەوەو داوای لێدەكەن بەردەوام بێت لە پۆستەكەی بۆ بەجێهێنانی
ئەركەكانی.
ئاوێنە:
ئیئتیلافی نەسر بەسەرۆكایەتی حەیدەر عەبادی، ئەمڕۆ پێنجشەممە لە بەیاننامەیەكدا
رایگەیاند، دەستلەكاركێشانەوەی بەرهەم ساڵح، سەرۆك كۆماری عێراق رەتدەكەینەوەو
داوای لێدەكەین دەستلەكاركێشانەوەكەی بكێشێتەوەو بەردەوام بێت لە بەرپرسیارێتییە
دەستوریی و نیشتمانییەكانی.
ئیئتیلافی نەسر
بەپێویستیشی زانیوە گۆڕانكاریی جەوهەری لە هاوكێشەی حوكمڕانی ئێستادا ئەنجام بدرێت
بەشێوەیەك كە لە قۆناغی كاتیدا توانای دەربازكردنی وڵاتی لەو قەیرانەی ئێستا
هەبێت.
هۆشداریشیداوە
كە سوربون لەسەر مانەوەی هاوكێشەی حوكمڕانی ئەم شێوەیەی ئێستا بەرەو نادیارمان
دەبات و ئەو هێزانەی ریفۆرمی راستەقینە رەتدەكەنەوە بەرپرسیارێتی تەواوەتیان
دەكەوێتە ئەستۆ لەبەردەم خواو نیشتمان و مێژودا.
لەلایەكی دیكەوە
خالد جەشمەعی، پەرلەمانتاری كوتلەی حیكمە لە كۆنگرەیەكی رۆژنامەوانیدا رایگەیاند،
ئەوەی لەناو نوسراوەكەی سەرۆك كۆماردا هاتوە، رەتدەكەینەوە كە باس لە
دەستلەكاركێشانەوەی دەكات و جەخت دەكەینەوە كە مانەوەی لە پۆستەكەداو تەواوكردنی
رۆڵی خۆی بۆ كۆكردنەوەی عێراقییەكان و پەرۆشی بۆ پێشێلنەكردنی دەستور پێویستە.
ئەمڕۆ پێنجشەممە
بەرهەم ساڵح، سەرۆك كۆماری عێراق ئامادەیی خۆی دەربڕی كە دەستلەكاركێشانەوەی خۆی
بخاتە بەردەم ئەنجومەنی نوێنەران و هەروەها رەتیشیكردەوە كە كاندیدی هاوپەیمانی
بونیاد، ئەسعەد عیدانی بۆ سەرۆكایەتی حكومەتی داهاتو رابسپێرێت.