خلوسی ئاكار، وەزیری بەرگری توركیا رایگەیاند بە لایەنی ئەمریكیان وتوە پێویستە
هیچ بۆشاییەك لەكاتی كشانەوەی هێزەكانی ئەمریكا لەسوریا دروست نەبێت و جەختیشی
لەوە كردۆتەوە كە پێویستە شەڕڤانانی یەپەگە لەو ناوچە ئارامەدا نەبن كە بانگەشەی
دروستكردنی دەكرێت لەسوریا.
ئاوێنە: دوێنێ خلوسی ئاكار، وەزیری بەرگری توركیا و پاتریك شاناهان، وەزیری
بەرگری ئەمریكا بەوەكالەت، بەبەشداری فەرماندە سەربازییەكانی هەردولا لەواشنتۆن
كۆبونەوە.
خلوسی ئاكار، ئەمڕۆ شەممە دەربارەی كۆبونەوەكەیان بە ئاژانسی ئانادۆڵی
توركی رایگەیاند لایەنی ئەمریكا رازی بون لەسەر ئەوەی كە رێگری بكرێت لە دواكەوتنی
نەخشەڕێگەی منبج و لەنزیكترین كاتدا جێبەجێكردنی ئەو نەخشەڕێگایە تەواوبكرێت.
وتیشی"لایەنی ئەمریكی وتویانە تاوتوێی ئەو بابەتە دەكەن."
وەزیری بەرگری
توركیا هێمای بۆ ئەوەش كردوە كە لەمیانی گفتوگۆكاندا جەختی لەسەر ئەوە كردۆتەوە كە
پێویستە لەكاتی كشانەوەی هێزەكانی ئەمریكا لەسوریا هیچ بۆشاییەك لەدەسەڵاتدا لەو
ناوچانەی سوریا دروست نەبێت.
هەروەك ئاماژەی
بەوەشداوە كە لەكۆبونەوەكەدا پرسی رادەستكردنەوەی فەتحوڵا گولەن، رابەری بزوتنەوەی
خزمەت و ئەندامانی دیكەی ئەو رەوتەیان بە توركیا كردوەو وتیشی"لەڕۆژانی
داهاتودا بەردەوام دەبین لەسەر چاودێریكردنی ئەو پرسە لەنزیكەوە."
خلوسی ئاكار ئەوەشی
خستۆتەڕو كە لەكۆبونەوەكەدا پرسی دروستكردنی "ناوچەی ئارام"یان لەسوریا تاوتوێ
كردوەو لایەنی توركیا بۆ ئەمریكییەكان جەختی لەسەر ئەوە كردۆتەوە كە پێویستە شەڕڤانانی یەپەگە لەو ناوچە ئارامە بكشێنەوەو ناوچەكەش بخرێتە ژێر سەرپەرشتی توركیا.