هێزەكانی بنكەی پۆلیسی سەرچنار تۆمەتبارێكیان دەستگیركرد كە تەقەی لەچەند یانەیەكی
شەوانە كردبوو ئاسەواری فیشەكیش بەو یانانەوە دیار بوە.
ئاوێنە:
بەڕێوەبەرایەتی پۆلیسی پارێزگای سلێمانی، ئەمڕۆ شەممە، لەڕاگەیەندراوێكدا كە
وێنەیەكی دەست ئاوێنە كەوتوە رایگەیاند؛ شەوی 21ی شوباتی
2019، لەناو سنوری گەڕەكی سەرچناری شاری سلێمانی كەسێك پشێوی و ئاژاوە دروست كردوەو
تەقەی لەسێ یانەی شەوانە كردوە، دەستبەجێ هێزەكانی بنكەی پۆلیسی سەرچنار گەیشتونەتە
شوێنی ڕوداوەكەو كەشف و هێڵكاریان بۆ شوێنەكە كردوەو دەستیان بە لێكۆڵینەوە كردوە.
هێمای بۆ ئەوەش كردوە كە پاش وەرگرتنی فەرمانی دادوەرو وەرگرتنی كامێراكانی
چاودێری و ناسینەوەی وێنەی تۆمەتبار، توانرا لەماوەی كەمتر لە 24 سەعاتدا تۆمەتباری
ڕوداوەكە دەستگیربكرێت و دەستیش بگیرێت بەسەر دەمانچەیەكدا كە بە تۆمەتبارەكە بوە.
ئەوەشی خستۆتەڕو لەئێستادا تۆمەتبار (أ. ك. أ.) دانیشتوی شاری سلێمانی و لەدایكبوی
1987، بەفەرمانی دادوەرو بەپێی ماددەی 430 لەیاسای سزادانی عێراقی ڕاگیراوەو بەپێی
دو بڕگەی مادەی 431 لەیاسای سزادانی عێراقی چارەنوسی دواخراوە.